Հիմա մենք ունենք խնդիր` կապված դեմ առ դեմ հանդիպումների հետ. Բայրամովը հայկական կողմին առաջարկում է վերադառնալ բանակցությունների սեղան

Ադրբեջանի արտաքին գործերի նախարար Ջեյհուն Բայրամովը Հայաստանի հետ խաղաղության պայմանագրի հարցում առցանց դիվանագիտությունն անարդյունավետ է համարել և Երևանին հրավիրել է վերադառնալ բանակցությունների սեղանի շուրջ։

«Հիմա մենք ունենք խնդիր` կապված դեմ առ դեմ հանդիպումների հետ, որոնք դուրս են գալիս համաձայնեցված ձևաչափից, բայց որպեսզի գործընթացն ամբողջությամբ չսպանվի, ադրբեջանական կողմը չի հրաժարվում մեկնաբանություններ ստանալ և ուղարկել»,- ասել է Բայրամովը Սերգեյ Լավրովի հետ բանակցություններից հետո կայացած մամուլի ասուլիսում։

Նա նշել է, որ սխալ կլինի ասել, որ վերջին վեց ամսվա ընթացքում բանակցություններում առաջընթաց չի գրանցվել։

«Որոշակի առաջընթաց կա, բայց եթե մենք  ավելի քիչ հանդիպեինք տարաբնույթ տհաճ անակնկալների, կարող էինք ավելի լավ արդյունք ունենալ: Եվ կարծում եմ, որ հայկական կողմը վերջապես կհասկանա ներկայիս իրավիճակը և կվերադառնա բանակցային սեղանի շուրջ, ադրբեջանական կողմը պատրաստ է դրան»,- հավելել է նա։