«Ինչո՞ւ եք կիսատ լուծում բերում, եթե փողի խնդիր չկա». պատգամավորը՝ հաշմանդամ զինծառայողին թոշակ հատկացնելու մասին

«Դուք ասում եք, որ փողի խնդիր չէ, այլ արդարության սկզբունքի խնդիր է»: Այս մասին ԱԺ-ում իր ելույթի ժամանակ ասաց «Հայաստան» խմբակցության պատգամավոր Թադևոս Ավետիսյանը՝ դիմելով Աշխատանքի և սոցիալական հարցերի փոխնախարար Դավիթ Խաչատրյանին:

Պատգամավորը հայտնեց, որ այդ տրամաբանությամբ, եթե մշտապես երրորդ խմբի հաշմանդամություն ունեցող զինծառայողը և նոր ֆունկցիոնալության համակարգի ներդրման հետևանքով առաջին և երկրորդ խմբից երրորդ խմբի հաշմանդամ դարձած զինծառայողները ստանալու են տարբեր գումարներ, ապա արդարության սկզբունքը խախտվում է:

«Սկզբունքը չափի մեջ չէ, այլ նույն կարգի հաշմանդամների՝ տարբեր չափի գումարներ ստանալու մեջ է»,- ասաց Թադևոս Ավետիսյանը:

Պատգամավորը նշեց, որ հաշմանդություն ձեռք բերած զինծառայողները պարզապես ներգրավված չեն աջակցության ծրագրերում, հակառակ դեպքում՝ նրանք կդառնային կայուն զբաղված և կապահովվեին աշխատանքով:

«Նախագծով պետությունը նվեր չի անում, այլ՝ իր պարտավորությունը: Արվում է ժամանակավոր կարգավորում, բայց արեք ամբողջական, ինչո՞ւ եք կիսատ լուծում բերում, եթե փողի խնդիր չկա, իսկ ես ենթադրում եմ, որ չկա: Եթե կարելի է քննիչի, դատախազի աշխատավարձը կրկնապատկել, ապա այս դեպքում նույնիսկ բարոյական չէ ամբողջական լուծում չբերելը: Այսպիսի կիսատ լուծումներով խնդիրը չի լուծվում»,-հայտարարեց ընդդիմադիր պատգամավորը:

Հիշեցնենք, որ  ԱԺ-ում քննարկվում է «ՀՀ պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» օրենքում փոփոխություններ և լրացումներ կատարելու մասին նախագիծը:

Դրանով առաջարկվում է նախկինում առաջին և երկրորդ կարգի հաշմանդամության կարգ ունեցող և զինծառայողների հիմնադրամից աջակցություն ստացած զինծառայողներին՝ երրորդ կարգի վերաորակում տալուց հետո հանել հիմնադրամի շահառուների թվից, բայց 3 տարի անցումնային ժամանակով հատկացնել դրամական աջակցություն: