Արցախի ԱԻՊԾ սակրավորները հայտնաբերել են շուրջ 96 միավոր ռազմամթերք

Փետրվարի 20-27-ն ընկած ժամանակահատվածում ԱԻ պետական ծառայության Կենտրոնական ու շրջանային բաժինների ճգնաժամային կառավարման կենտրոններում գրանցվել է 820 զանգ, որից 12-ը՝ տեխնածին, 24-ը՝ կենցաղային բնույթի կանչեր են, մյուս բոլոր զանգերը ճանաչողական բնույթի են:

Արցախի ՆԳՆ ԱԻ ծառայությունից հայտնում են, որ շաբաթվա ընթացքում փրկարարներն արձագանքել են բոլոր կանչերին՝ կատարելով փակված 8 դռան և 9 վերելակի բացում, 2 քաղաքացի փրկարարների օգնությամբ տեղափոխվել է բուժհաստատություն: Բնակչությանն օգնություն ցուցաբերելու և ջուր մատակարարելու նպատակով կատարվել է 2-ական ելք:

Յոթ օրվա ընթացքում ծառայության հրշեջ փրկարարները կատարել են 4 ելք, իրականացրել շիջման և համապատասխան կանխարգելիչ գործողություններ:

Հրդեհների մեծ մասի բռնկման պատճառ է հանդիսացել այգիներում և չոր ենթատարածքներում չվերահսկվող կրակը: Առաջիկա օրերին կանխատեսվում է 10-15 աստիճանով ջերմաստիճանի բարձրացում: ԱԻ ծառայությունը հորդորում է պահպանել հրդեհային անվտանգության կանոնները:

Կյանքի համար վտանգ ներկայացնող սպառնալիքները կանխելու նպատակով՝ փրկարար ուժերի վարչության սակրավորական խմբերը՝ գործընկեր կազմակերպությունների հետ հանրապետության տարածքում շարունակում են հետախուզական, միաժամանակ հայտնաբերված զինամթերքի ոչնչացման աշխատանքները:

Փետրվարի 20-27-ն ընկած ժամանակահատվածում ԱԻՊԾ սակրավորները կատարել են 7 ելք: Հայտնաբերվել է շուրջ 96 միավոր տարբեր տեսակի ու տրամաչափի ռազմամթերք:

Ներքին անվտանգության պատշաճ ապահովման և բնակչությանը ժամանակին օգնություն ցուցաբերելու նպատակով, ՆԳ նախարարության բոլոր ծառայություններն ու ստորաբաժանումներն աշխատում են շուրջօրյա համակարգված ռեժիմով: