Իրավիճակը արդեն բերվել և հասցվել է վատթարագույն և ամենավտանգավոր հանգրվանին․ Աբրահամյան

Ստեղծվել է ճնշում գործադրելու շղթա, որի ամենավերջին օղակը Արցախի նախագահն է։ Ալիևը ճնշում է Փաշինյանին, իսկ Փաշինյանը՝ Հարությունյանին։ Այդ մասին Ֆեյսբուքի իր էջում գրել է Արցախի «Արդարություն» կուսակցության երիտթևի ղեկավար Արշակ Աբրահամյանը։

«Եթե ուզում ենք փրկել երկիրը հետագա փորձանքներից` ապա պետք է այդ շղթայի որևէ օղակը հեռացվի (չնայած ես կգերադասեի որ միանգամից երկու օղակ հեռացվեր)։

Այս ամենի մեջ ամենավճռորոշը կարող է դառնալ հասարակության դերը։ Մարդիկ հստակ պետք է գիտակցեն որ սա վերջն է և սեփական երկրի ու ապագայի համար պայքարը չի նշանակում զբաղվել քաղաքականությամբ։

Բացարձակ նպատակ չունեմ խուճապ տարածելու, բայց իրավիճակը արդեն բերվել և հասցվել է վատթարագույն և ամենավտանգավոր հանգրվանին, որից այն կողմ լիակատար կործանումն է։ Եվ կարող եք վստահ լինել, որ Արցախը վերցնելուց հետո ադրբեջանի ախորժակն էլ ավելի է մեծանալու և հերթը հասնելու է ՀՀ մարզերին։

Արցախը տալով ՀՀ-ն չեք փրկելու...

Պետք է համախմբվել և բեկում մտցնել այս խայտառակ և ստորացուցիչ իրավիճակում»,-գրել է նա։