Ադրբեջանը Հարավային Կովկասում Թուրքիայի քաղաքական պրոյեկտն է. թյուրքագետ

Շատերդ լսել եք այն արտահայտությունը, թե Ադրբեջանը Թուրքիայի կրտսեր եղբայրն է, բայց իրականում Ադրբեջանը երբեք չի եղել Թուրքիայի կրտսեր եղբայրը, երբեք չի եղել ուղղակի Թուրքիայի դաշնակից պետությունը։ «Բեկում» խորագրով համաերիտասարդական ֆորումին ասաց պ.գ.թ., թյուրքագետ Վարուժան Գեղամյանը

Նրա խոսքով, Ադրբեջանն իր ստեղծման պահից, նույնիսկ դրանից առաջ, երբ հորինվում էր Ադրբեջան պետության կոնցեպտը, հանդիսանում էր Հարավային Կովկասում Թուրքիայի շարունակությունը, կամ Թուրքիայի նահանգներից մեկ։

«Այսինքն՝ Ադրբեջանը Հարավային Կովկասում Թուրքիայի քաղաքական պրոյեկտն է»,- պարզաբանեց թյուրքագետը։

Նրա խսքով՝ 2020 թվականի նոյեմբերից հետո ականատես ենք լինում, թե ինչպես են Ադրբեջանի պետական ամբողջ համակարգը, հասարակական տարբեր կառույցները լիարժեք ինտրեգրվում թուրքական պետության հետ։ Դրա ամենավառ վկայությունն, ըստ նրա, ադրբեջանական բանակի փաստացի վերածումն է թուրքական արևելյան դաշնային բանակի։

Այսինքն, թյուրքագետ փոխանցմամբ, 2020 թվականի պատերազմից հետո տեսնում ենք, թե ինչպես է Թուրքիայի գլխավոր շտաբը ղեկավարում Ադրբեջանի ԶՈւ-ն։

«Ավելին, պատերազմի ընթացքում էլ, ըստ էության, թուրքական գլխավոր շտաբն էր ղեկավարում գործողություններն արցախյան ճակատում, որը հավելյալ օժանդակություն էր ադրբեջանական կողմին։ Բայց նույնիսկ արյդքան օժանդակությամբ, բացի մի քանի հատվածներից որևէ այլ կողմում թուրքական կողմերը չկարողացան հաջողության հասնել»,- նշեց Վարուժան Գեղամյանը։

Նրա խոսքով՝ թուրքական և ադրբեջանական բանակները ևս ինտեգրվել են։ Դրա վառ վկայությունն, ինչպես նշում է թյուրքագետն, այն է, որ Թուրքիայի գլխավոր շտաբի ամենակարկառուն ներկայացուցիչներից մեկը՝ գեներալ Բախտիար Էրսայը, դարձել է Ադրբեջանի նախագահի խորհրդական։

Այսպիսով, ըստ նրա, ժամանակակից Ադրբեջանն էլ ավելի մեծ ծավալով վերածվում է Թուրքիայի ամենաարևելյան նահանգի։