Կորցնում ենք սուվերենությունը, առաջին քայլից հետո լինելու է Զանգեզուրի միջանցքի, Սյունիքի և շատ այլ կորուստներ. Խաչիկյան

Եթե Ալիևի նպատակն է ոչնչացնել, խեղդել արցախահայությունը, իհարկե նա կցանկանա անցակետեր տեղադրել, քանի որ համարում է, որ դա իր տարածքն է, չնայած, որ դա խախտում է նոյեմբերի 9-ի պայմանագիրը: Այս մասին լրագրողների հետ զրույցում ասաց Սթենֆորդի համալսարանի քաղաքագիտության դոկտոր Արթուր Խաչիկյանը:

«Այս խմբի քաղաքականությունն է՝ հեռանալ ռուսական տարբերակից և մոտենալ արևմտյան տարբերակին, քանի որ ՌԴ-ն է հովանավորում, ՌԴ-ն է մասնակից այդ պայմանագրին, որքանով հեռանում ենք Ռուսաստանից, այնքան՝ թուլացնում ենք այդ պայմանագրի ուժը: Այսինքն՝ կարող է նոր պայմանավորվածություն լինի, որի համաձայն՝ այո, կարող են տեղադրվել ադրբեջանական անցակետեր, այսինքն, դա դառնա ադրբեջանական տարածք, ոչ թե՝ միջանցք»,- նշեց Խաչիկյանը:

Նրա խոսքով՝ մենք հիմա գտնվում ենք երկրորդ և ավելի վտանգավոր սառը պատերազմի առաջին օրերին, պարզ է, որ արևմուտքի և Ռուսաստանի այս ճակատամարտի ժամանակ նրանք փորձելու են ցանկացած ձևով ՌԴ-ին դուրս հանել այս տարածաշրջանից, դրա համար էլ ճնշումներ են գործադրվում մեր ղեկավարների վրա, որ որքան հնարավոր է շուտ պայմանագիրը կնքվի, Արցախը զիջեն, բավարարեն Ադրբեջանի պահանջները, ինչից հետո Հայաստանը վերջնականապես կորցնի իր սուվերենտությունը և մենք դառնանք Թուրքիայի հպատակ երկիր և ՌԴ-ն ստիպված կլինի դուրս գալ:

«Ցավոք սրտի՝ մեր ներկայացուցիչներչը դա չեն հասկանում, կամ հասկանում են և ընդունում են, կամ հենց այդ ծրագրով եկել են: Ցավոք սրտի դա շատ ծանր կնստի մեզ վրա»,- նշեց նա:

Խաչիկյանի խոսքով՝ շատ դժվար վիճակում ենք, քանի որ շատ սխալներ ենք արել, ամեն դեպքում, պետք է շարունակել գոնե պայքարել դրա համար, ոչ թե՝ միանգամից հանձնել:

«Հանձնելով՝ կորցնում ենք սուվերենությունը ռեգիոնում, քանի որ առաջին քայլից հետո լինելու է մյուս քայլերը, այսինքն՝ Զանգեզուրի միջանցքը, Սյունիքը և շատ այլ կորուստներ»,- նշեց նա: