Արցախի միջազգային ճանաչման հնարավորությունները սպառված չեն. Ավետիք Չալաբյան

Մենք ունենք այն ողբերգական գործոնը, որ Հայաստանում այսօր իշխանությունները նրանք են, ովքեր որ են. դա, իմ կարծիքով, պատմական ձախողում և թյուրիմացություն է, որ այդպիսի խմբակը Հայաստանում եկել է իշխանության և շարունակում է իշխանություն պահել, բայց դա բոլորովին չի նշանակում, որ մենք պետք է համակերպվենք այդ գաղափարին: Այս մասին այսօր լրագրողների հետ ճեպազրույցում ասաց «Արար» հիմնադրամի համահիմնադիր Ավետիք Չալաբյանը «Արցախի Հանրապետության միջազգային ճանաչման հրամայականը» գիտագործնական համաժողովից հետո:

«Այսօրվա քննարկումը, այսօրվա բանախոսությունը գալիս են ևս մեկ անգամ վերահաստատելու այն գաղափարը, որ այսօրվա իշխանությունը ոչ կոմպետենտ է և Հայաստանը, մասնավորապես՝ Հայաստանի անվտանգությունը և Արցախի հարցի կարգավորումը տանում է սխալ ճանապարհով՝ չունենալով այն կոմպետենտությունը, այն որակները և այն գիտելիքները, որոնք հնարավորություն կտային նախկինում սկսած ճանապարհն օրգանապես զարգացնել և հասնել մեզ համար շատ ավելի անվտանգ հանգրվանի»,- ասաց Չալաբյանը: 

Նա նշեց, որ իրենք այսօր փորձում ենք ինչ-որ իմաստով այլընտրանք ձևավորել այս իշխանությանը՝ սկզբից գաղափարի մակարդակով, այնուհետև՝ քաղաքական այլընտրանքի մակարդակում, որպեսզի մեր հանրությունը հասկանա, որ այն, ինչ անում է այս իշխանությունը, բոլորովին էլ անխուսափելի չէ, բոլորովին էլ պարտադրված չի մեզ, այլ ընդհակառակը՝ այս իշխանության սխալների արդյունքն է: 

Չալաբյանը վստահեցրեց, որ Արցախի միջազգային ճանաչման հնարավորությունները սպառված չեն, այդ հնարավորությունները կան և այդ հնարավորություններից մենք պետք է օգտվենք: