ՊՆ նախկին շենքի բնակիչներն ավելի քան 1 շաբաթ է՝ դրսում են մնում. 2 մանկահասակ երեխա հոսպիտալացվել է

ՊՆ նախկին շենքում բնակություն հաստատած և այնտեղից վտարված քաղաքացիները արդեն մեկ շաբաթ է, դրսում են, վրան են տեղադրել շենքի մոտ և այնտեղ են ապրում:

Վրանի բնակիչներից մեկը նշեց. «Երկու անչափահաս երեխաներ, որոնք դեռ չեն քայլում, հիվանդանոցում են. երեկ մեկին են տարել, այսօր՝ մյուսին: Կանայք են վատացել, տղամարդկանց մեջ էլ երկուսը վատացել էին: Շտապօգնությունը օգնություն ցուցաբերել է: Մենք այստեղ ենք մնալու մինչև հասնենք մեր նպատակին, վերադառնանք մեր տները»:

Մի կին էլ նշեց, որ երեք օր մնացել են դրսում, մինչև վրան են խփել. «Երկրորդ վրանը խփելու թույլտվություն չեն տալիս: Այս ընթացքում շատերն են մեզ մոտեցել, այդ թվում պատգմավորներ: Մի դեպուտատ մեզ օգնել է, որ առաջին վրանը դրել ենք: Պետական մարմիններից որևէ արձագանք չունենք: Սպասում ենք, որ կմոտենան, հույս ունենք, որ կա նախագահ, որ ցանկություն կունենա տեսնել ժողովրդի վիճակը»:

Հիշեցնենք՝ փետրվարի 16–ին, ոստիկանությունը ՊԵԿ–ի գրության հիման վրա՝ ապօրինի ներխուժումը վերացնելու պահանջով, այդ շենքերում ապրող մարդկանց դուրս էր հանել շենքից։ ՊՆ նախկին շենքը 2008 թվականից է դադարել ծառայել պաշտպանության նախարարությանը։ Նախորդ տարվա ապրիլին կառավարությունը որոշեց այն ամրացնել Պետական գույքի կառավարման կոմիտեին, որն էլ հետո շենքը տրամադրեց ՊԵԿ–ին։