Բերեք չասեմ՝ դեմ եմ, թե կողմ, բայց հայ-թուրքական սահմանի բացումով՝ մարզը, միանշանակ, կզարգանա. Շիրակի մարզպետ

«Փառք Աստծուն, Գյումրին ծաղկուն քաղաք է։ Ես օր օրի տեսնում եմ, որ սոցիալական խնդիրները նվազում են»: Այս մասին այսօր կառավարության նիստից հետո լրագրողների հետ ճեպազրույցում ասաց Շիրակի նորանշանակ մարզպետ Մուշեղ Մուրադյանը:

Նա հույս հայտնեց, որ հայ-թուրքական սահմանը բացելուց հետո մարդկանց վիճակն էլ ավելի կբարելավվի:

«Կանխատեսում չանեմ, բայց առանց սահմանի բացման էլ Շիրակի մարզը զբոսաշրջության առումով ծաղկուն, լավ վիճակում է, իսկ սահմանի բացումով մարզը, միանշանակ, կզարգանա։ Բերեք չասեմ՝ դեմ եմ, թե կողմ սահմանի բացմանը, երբ զարգացումներ ընթանան՝ արդյունքներով պետք է գոհ կամ դժգոհ լինենք, կողմ կամ դեմ լինենք»,- ասաց մարզպետը։

Լրագրողների դիտարկմանը, որ գյուղացիները հակառակն են ասում, օրինակ՝ թուրքական էժան գյուղմթերքը մեր շուկան կգրավի, գյուղացիների բերքը չի վաճառվի, մարզպետը պատասխանեց․ «Ցանկացած պարագայում, երբ որևիցե տարածքում ներդրումներ են լինում, էստեղ էդ ներդրումները չկապենք բաց ու փակի հետ, էս ներդրումները կապենք ներդրողների, արտադրության և տնտեսության զարգացման հետ։ Երբ ֆինանսական հոսքեր են լինում, բնականաբար, զարգացում չի կարող չլինել»։