Դաշնակները կզոհաբերեն հին ընկերներին

Դաշնակցությունը հանուն կոալիցայի պատրաստ է անգամ սեփական ընկերներին մոռանալ, հնի փոխարեն նոր սկզբունքներ է որդեգրել, և ինչպես կասեր Վահրամ Բաղդասարյանը` այս պարագայում ՀՅԴ-ն գնում է ՀՀԿ-ի ծրագրերը իրականացնելու ու պատասխանատվություն կիսելու:

ՀՅԴ-ի կոալիցա մտնելու որոշման պատճառով որոշ դաշնակցականներ արդեն իսկ տեղեկացրել են կուսակցության վերնախավին, որ լքելու են կուսակցությունը: Կոալիցիա մտնելու որոշումը հատկապես սուսերով է ընդունվել մարզային կառույցներում, քանի որ այստեղ աշխատում են, իսկ վերնախավը վայելում:

Այսօր լրագրողների հետ զրույցում ՀՅԴ խմբակցության քարտուղար Աղվան Վարդանյանը պատասխանելով այն հարցին, թե հաստատում է, որ ՀՅԴ-ում միանշանակ չեն ընդունել կոալիցիայի անդամակցությանը, և արդեն իսկ որոշ դաշնակցականներ կուսակցություն լքելու մասին հայտարարություն են արել և այս պարագայում արդյո՞ք նույնիսկ այդ գնով են պատրաստ ՀՀԿ-ի հետ կոալիցիա կազմել՝ ասել է , թե նախ ասվել են սկսած գործընթացի, քննարկումների մասին, սակայն դեռ որևէ հստակություն չկա:

Ըստ նրա՝ ենթադրվում է, որ այս շաբաթվա ընթացքում քննարկումները կշարունակվեն ՀՀԿ կուսակցության ղեկավարության հետ և հստակ ասելիք կլինի.« դաշնակցությունը հսկայական կառույց է և առաջնորդվում է իր հավաքական որոշումներով, ընդհանուր ժողովի որոշումներով: Բայց չեմ բացառում, որ մեկ- երկու անդամ, այլ տեսակետ կունենա, բայց դա չի նշանակում, որ մեկ-երկուսի կարծիքը Դաշնակցության տեսակետն է»,-հայտարարել է Վարդանյանը:

Թեև Աղվան Վարդանյանը վստահեցրել է, որ պորտֆելի հարց չի քննարկվել: Ակնահայտ է, որ հին ընկերներին Դաշնակցությունը պատրաստ է մոռանալ հենց պորտֆելների համար: Բայց դաշնակներին մնում է բավարարվել նախագահի տված փշրանքներով` մի 2 նախարար, մի 2 մարզպետ, մի քանի այլ պաշտոններ: Պորտֆելները ստանալուց հետո արդեն դաշնակցականները  աղբանոցի ներքին շերտից դուրս գալ այլևս չեն կարողանա: