Մահացել է 44-օրյա պատերազմում զոհված զինծառայողի հայրը (լուսանկար, տեսանյութ)

Մահացել է 44-օրյա պատերազմում զոհված զինծառայող Վազգեն Ասլանյանի հայրը՝ Արմեն Ասլանյանը: Վերջինիս սիրտը չի դիմացել տանկիստ որդու կորստին։

Իր հարցազրույցներից մեկի ժամանակ, հայրը պատմել է. «Որ կապնվում էի տղայիս հետ, նրանց հետ էլ էի զրուցում, նրանք մի տեղ մեզ էին դուխ տալիս, ասում էին՝ հոպար դիմացեք, մինչև ստեղ մաքրենք գանք հասնենք քեզ, ասում էի՝ զգույշ եղեք։ Երեքն էլ ասում էին՝ թուրքն ում շունն ա, որ վախենանք ու բարձր ծիծաղում։ Այսպես 5 օր և զոհվեցին տղես և ընկերները միասին»։

Վազգենն իր տանկով ոչնչացրել է հակառակորդի 4 т 90 տանկ, ոչնչացրել թուրքի հենակետեր մեր ուղղության վրա։ Սեպտեմբերի 27-ին վաղ առավոտյան ժամը 7։20 զանգել է հորը և ասել «պապ, կռիվ ա սկսվել»։

Հայրը հենց նույն օրը մեկնել է Արցախ, սակայն չի կարողացել հասնել որդուն․ «Վազգենս ու ես մի քիչ իրարից հեռու էինք գտնվում, չարաբաստիկ հոկտեմբերի երկուսին, երբ սկսեցին ռմբակոծել մեր ուղղություն, որդիս զոհվեց, ես էլ վիրավորվեցի»։

Իր զրույցում հայրը նաև նշել էր․ «Հենց հաջորդ օրն էլ հնարավոր էր պատերազմը կանգնեցնել, կամ գոնե 4-րդ օրը, դրա համար պարզապես լավ ղեկավար պիտի ունենայինք: Ապրիլյան քառօրյան դրա վառ ապացույցը, որ Ադրբեջանը խնդրեց ՌԴ-ին, որ միջնորդի պատերազմը կանգնեցնել․․․»։

Վազգենի Կենսագրությունը

Ծնվել է 28.04.2001թ.։

Վազգենը բռնցքամարտիկ էր՝ բազմակի մեդալակիր։ Ծառայության էր անցել 2019թ.։

Ծառայել է Մարշալ Բաղրամյանի ուսումնական զորամասի տանկային գումարտակում, ստացել է կրտսեր սերժանտի զինվորական կոչում, 2020թ-ի հունվարին տեղափոխվել Արցախի Մարտակերտի շրջան գյուղ Սրխավեն, տանկային գումարտակի 716-րդ տանկի հրամանատար։

Պատերազմի սկզբից իր ընկերների հետ մասնակցել է Մատաղիսի և Թալիշի մարտերին, առաջին իսկ օրը իրենց գումարտակի տանկերը հակառակորդը շարքից հանել է, մնացել է ընդամենը չորս տանկ, որոնց հոկտեմբերի 2-ին թշնամին շարքից հանել է:

Այսպիսով բոլոր տանկիստները զոհվել են, Վազգենը մասնակցել է հինգ օր և զոհվել։

Իր ընկերներից ամեն մեկը մի լույս էին, հզոր և անվախ։

Նահատակվել է քաջի մահով հոկտեմբերի 2-ին հրետակոծությունից:

Հարգանք և խոնարհում մեր հերոսին։