Անկախ բժշկուհու գործողություններից, Մերի Մարգարյանը մահանալու էր. փաստաբան

Մենք ոչ թե մեղավոր ենք փնտրում, այլ զոհ: Այսօր՝ հունվարի 25-ին, լրագրողների հետ հանդիպման ժամանակ ասաց Երեւանի «Շենգավիթ» ԲԿ-ի բժշկուհի Շուշանիկ Բախշյանի փաստաբան Ալեքսանդր Սիրունյանը:

«Մենք արդարադատություն ենք փնտրո՞ւմ, թե` զոհ, չեմ հասկանում: Համոզված եմ, որ Մերի Մարգարյանի ընտանիքը ոչ թե զոհ է ուզում, այլ մեղավոր»,- ասաց փաստաբանը` հավելելով, որ Շուշանիկ Բախշյանը համաձայն է իր պատիժը կրել, եթե դատարանն իր մեղքը հաստատի:

Ալեքսանդր Սիրունյանի խոսքով` եթե այս գործով ազատազրկվող մարդ լինի, ապա դա Շուշանիկ Բախշյանը չի լինելու: Փաստաբանը չբացահայտեց, թե ով է ճանաչվելու մեղավոր, սակայն նկատեց, որ անկախ բժշկուհի Շուշանիկ Բախշյանի գործողություններից, միևնույն է` ծննդկան Մերի Մարգարյանը մահանալու էր:

Ալեքսանդր Սիրունյանը ընդգծեց, որ օրեր առաջ բժշկուհու ձերբակալությունն ապօրինի էր և այժմ էլ պատրաստվում է կրկնակի հանձնաժողովային փորձաքննություն նշանակելու միջնորդություն ներկայացնել:

Դիտարկմանը, թե Շուշանիկ Բախշյանը փախուստի է դիմել, փաստաբանն ասաց, որ իր պաշտպանյալը երբեք չի ցանկացել թաքնվել իրավապահ մարմիններից:

Հիշեցնենք, որ Մերի Մարգարյանը մահացել է կեսարյան հատումից հետո: Նկատենք, որ հանձնաժողովային դատաբժշկական փորձաքննության եզրակացության համաձայն` հիմնավորված է, որ կա թերություն:
Դեպքի առթիվ հարուցվել էր քրեական գործ, որի շրջանակում օրեր առաջ՝ հունվարի 22-ին, ձերբակալվել էր «Շենգավիթ» բժշկական կենտրոնի բժշկուհի Շուշանիկ Բախշյանը, սակայն կարճ ժամանակ անց ազատ արձակվել: