«Հայաստանից դեպի Արցախ հոսքը պետք է լինի մի քանի անգամ ավելի շատ». քաղաքագետը կոչ է անում Լաչինի միջանցքն ապաշրջափակելուց հետո այցելել Արցախ

Քաղաքագետ Ստեփան Դանիելյանը հայաստանցիներին կոչ է անում Լաչինի միջանցքն ապաշրջափակելուց հետո այցելել Արցախ։

«Հայաստանից դեպի Արցախ հոսքը պետք է լինի մի քանի անգամ ավելի շատ, քան Արցախից Հայաստան։ Սա ընդունեք որպես կոչ»,-այս մասին քաղաքագետը հայտարարեց «Հայրենիք» կուսակցության կողմից նախաձեռնած «Ղարաբաղյան պրոֆիլ» խորագրով համաժողովի ժամանակ։

Ստեփան Դանիելյանի խոսքով, Արցախ այցելությունները կլինեն կամքի ցուցադրություն։

«Երբ մեր թշնամի երկրի ղեկավարն ասում է, այ տեսեք, պարտված, կապիտուլյացիայի ենթարկված ղեկավարին ժողովուրդն ընտրել է, հետևաբար ժողովուրդն ընտրել է կապիտուլյացիան, մենք մեր մեծ հոսքով դեպի Արցախ պետք է ցույց տանք, որ կամքը սա է, այս երկրի քաղաքական իշխանությունը ժողովրդի կամքը չի արտահայտում»,-ասաց Ստեփան Դանիելյանը։