Արևմուտքը հստակ աշխատանք է տանում՝ ՌԴ-ի ազդեցությունը մեր տարածաշրջանում նվազեցնելու կամ ընդհանրապես դուրս մղելու ուղղությամբ. Սարգսյան

Հայաստանի իշխանություններն առանձնապես թափանցիկ չեն աշխատում: Չկան նաև հստակ տեղեկություններ, ինչի պատճառով էլ փորձագիտական շրջանակները ստիպված են ինչ-որ փոքր տեղեկությունների վրա հիմնվելով՝ կատարել իրենց վերլուծությունները: Իհարկե, դա ցանկացած փորձագետի համար խնդրահարույց է: Սակայն, ըստ էության, ունենք այն, ինչ ունենք: Այս մասին լրագրողների հետ զրույցում ասաց միջազգայնագետ Սուրեն Սարգսյանը՝ անդրադառնալով «խաղաղության պայմանագրի» արևմտյան տարբերակի ավելի ամրապնդման հետ կապված հարցին:  

Անդրադառնալով լրագրողների առաջ քաշած այն փաստին, թե Ադրբեջանի նախագահ Ալիևը հայտարարել էր, որ Հայաստանի ժողովուրդը համակերպվել է այս ամենի հետ, քանի որ մանդատ է տվել Նիկոլ Փաշինյանին, Սարգսյանը նշեց. «Դրա մասին բազմիցս խոսվել է և խոսվել է թե՛ ընտրություններից առաջ, թե՛ հետո: Եվ ես, ըստ էության, հենց ընտրություններից առաջ էլ ասում էի, որ այս ընտրությունները մեծ հաշվով կանաչ լույս են լինելու այն քաղաքականության համար, որը Հայաստանը տանում է: Եվ հենց այդպես էլ եղավ: Ալիևն էլ հենց նույն բանն է ասում, որ Հայաստանն ընտրել է այդ ճանապարհը և այդ ճանապարհով գնում է: Եվ այդ ընտրությունն ամրապնդված է ժողովրդի կամքով: Սա իհարկե խնդիր է»:

Հարցին, թե ինչ է այս պահին ակնկալում Արևմուտքը՝ միջազգայնագետը նշեց, որ Արևմուտքը հստակ աշխատանք է տանում, որպեսզի մինիմալիզացնի Ռուսաստանի ազդեցությունը տարածաշրջանում: Սա նորմալ աշխարհաքաղաքական մրցակցություն է, որևէ նոր բան այստեղ չկա: 

«Մրցակցություն կա, մրցակցությունը տեղի է ունենում, մրցակցությունը շարունակվելու է և տասնամյակներ շարունակ գնալու է առաջ: Կարծում եմ, որ մենք ականատես են լինելու այդ մրցակցության ավելի թեժացմանը: Նպատակը Ռուսաստանի ազդեցությունը մեր տարածաշրջանում նվազեցնելը կամ ընդհանրապես դուրս մղելն է: Այդ ամենը տեղավորվում է այն քաղաքականության մեջ, որը Վաշինգտոնը տանում է, և բնականաբար, տանում է նաև Բրյուսելը: Այս ամեն ինչն ավելի ցցուն է երևում ուկրաինական պատերազմի ֆոնին»,- նշեց Սարգսյանը: