Ի՞նչ գին ենք մենք վճարելու խաղաղության դիմաց. պետք է հասկանանք՝ մեզ պե՞տք է այդպիսի խաղաղություն, թե՞ ոչ. Արթուր Վանեցյան

«Մեկ բռունցք դառնալու փոխարեն, այսօր տեսնում ենք, թե ինչպես են մեր ժողովրդին պառակտում՝ յուրայինների և հակառակորդների, սևերի և սպիտակների, նախկինների և ներկաների, ռուսամետերի և արևմտամետերի և չենք կարողանում ունենալ միասնություն ու դուրս գալ ստեղծված իրավիճակից։ «Ղարաբաղյան պրոֆիլ» քննարկման ժամանակ այս մասին ասաց «Հայրենիք» կուսակցության նախագահ Արթուր Վանեցյանը։

Նա նկատեց, որ արդեն 2 ամիս է, ինչ Արցախը շրջափակված է և ընդգծեց՝ ոչ մի անգամ Արցախն այսքան վտանգված չի եղել։ Ավելին՝ Վանեցյանի դիտարկմամբ, այսօր վտանգված է ոչ միայն Արցախը, այլև Հայաստանը:

Ըստ Վանեցյանի՝ որևէ նորմալ մարդ չի կարող խոսել խաղաղության մասին, քանի որ պետք է հասկանալ, թե ինչ գին ենք վճարելու այդ խաղաղության դիմաց: 

«Արդյոք մենք գիտե՞նք, թե ինչ է գրված այդ պայմանագրում, ի՞նչ գին ենք մենք վճարելու այդ պայմանագրի դիմաց։ Մենք պետք է ստիպենք, որ ժողովրդի թիկունքում որևէ պայմանագիր չստորագրվի, թող հրապարակեն, տեսնենք՝ ինչի՞ մասին է խոսքը, տեսնենք ու հասկանանք, մեզ պե՞տք է այդպիսի խաղաղություն, թե՞ ոչ։ Հարց է առաջանում՝ Նիկոլ Փաշինյանի ու իշխող ուժի կողմից ստորագրվելիք խաղաղության պայմանագրից հետո, արդյոք հայերը կարողանալո՞ւ են ապրել իրենց երկրում՝ ինքնիշխան Հայաստանում, ունենալո՞ւ ենք Արցախ, թե՞ ոչ, իրացվելո՞ւ է Արցախի ժողովորդի ինքնորոշման անքակտելի իրավունքը, թե՞ ոչ, ունենալո՞ւ է Արցախի ժողովուրդն անվտանգության երաշխքիներ, թե՞ ոչ։ Հարցերը շատ են։ Ես ուզում եմ վստահեցնել, որ անձամբ ես, իմ գործընկերները, հայության ճնշող մեծամասնությունը թույլ չեն տալու այսօրվա իշխանություններին ստորագրել այնպիսի փաստաթուղթ, որը կբերի մեզ ավելի խոր ճգնաժամի, կվտանգի Հայաստանի ու Արցախի ապագան»,- ընդգծեց Արթուր Վանեցյանը: