Իմ տղեն 00:30 ընկերուհու հետ խոսել ա, էդ 10 րոպեի մեջ էդ ո՞նց քնեց, որ չկարողացավ դուրս գալ. հրդեհից մահացած զինվորի ծնող (տեսանյութ)

Կառավարության դիմաց իրենց հուզող հարցերի պատասխանները պահանջող՝ մահացած զինծառայողների ծնողներն իրենց ուժերով «հետաքննություն» են սկսել: Նրանք եղել են Գեղարքունիքի մարզի Ազատ գյուղում, որտեղ տեղի է ունեցել զինվորների կացարանի հրդեհն և ուսումնասիրություններ կատարել: 

Նրանք լրագրողների հետ զրույցում մի քանի մանրամասներ հայտնեցին և տեղեկացրին, որ էլի փաստեր ունեն իրենց ձեռքի տակ, որոնք մի բան են վկայում՝ տղաներին միտումնավոր են հրդեհել:

Բացի այդ, նրանք նկատում են, որ ըստ պաշտոնական տվյալների՝ հրդեհը տեղի է ունեցել 00:30-ից 00:40-ի սահմաններում, ինչը, ծնողների խոսքով, անհնար է:

Նրանցից մեկը վստահեցրեց, որ 00:30 խոսել է որդու հետ, և իմացել, որ նստած սուրճ են խմում տղաներով: Մեկ այլ ծնող էլ նշեց, որ նույն ժամին իր տղան էլ ընկերուհու հետ է խոսել և դարձյալ ասել, որ սուրճ են խմում:

«Իմ տղեն 00:30 ընկերուհու հետ խոսել ա, էդ 10 րոպեի մեջ էդ ո՞նց քնեց, որ չկարողացավ դուրս գալ: Ո՞նց կարար հրդեհ լիներ ու ինքը չնկատեր»,- ասաց զոհվածի ծնողը և հավելեց. «28 քառակուսու մեջ 22 զինվո՞ր են պահում: Իրանց պետք չեն մեր երեխեքը՝ մեզ պետք են, ինչի՞ են տանում,վառում: Իրանք են վառել, թե թուրքն ա վառել, թե ներքին թուրքն ա վառել . ձեռքները ծալել, չեն ուզում մի բան բացահայտեն: Մենք ենք ընկել ստեղ-ընդեղ, որ մի բան պարզենք»:

Նա նկատեց, որ թող ոչ մեկի մտքով չանցնի, թե ամեն ինչ այսպես մնալու է կիսատ ու չբացահայտված:

«Մի քանի հոգու շանսատակ կանենք, եթե մնաց չբացահայտված»,- ասաց նեղսրտած ծնողը: