Անգամ Եվրադատարանը չի կարողանում զսպել հայ պաշտոնյաների ախորժակը

2016թ-ը սկսվեց Մարդու իրավունքների եվրոպական դատարանն ընդդեմ Հայաստանի երեք վճռով:

Նշենք, որ 2002թ-ից` Հայաստանի անդամակցությունից հետո Եվրադատարան մասամբ դիմել են «հանրային գերակա շահերի» զոհերը, որոնց վերաբերյալ դատավճիռներ սպասում են նաև առաջիկայում:

«Հանրային գերակա շահերի» զոհերի իրավունքների դեռևս միակ պաշտպանը եղել և մնում է Եվրոպական դատարանը:

Եվրադատարանի կողմից Հայաստանի դեմ կայացրած վճիռները վերաբերում են կալանավայրերում բանտարկյալների նկատմամբ անմարդկային վերաբերմունքին, ոստիկանական համակարգի թերություններին, խոշտանգումներին: «Հանրային գերակա շահերի զոհերը» զուգահեռվում են խոշտանգումների, կալանավայրերում մարդկանց նկատմամբ անմարդկային վերաբերմունքի հետ:

ՀՀ գլխավոր դատախազ, Մարդու իրավունքների եվրոպական դատարանում ՀՀ կառավարության լիազոր ներկայացուցիչ Գևորգ Կոստանյանը մի առիթով նշել էր, որ ՀՀ քաղաքացու իրավունքն է դիմել Եվրոպական դատարան, սակայն պետք է Հայաստանում մինչև վերջ փորձել հասնել արդարության:

Սակայն միայն այն, որ «Գլենդել Հիլզ»-ը սնանկ ճանաչվեց և իր «հանրային զոհերին» թողեց անտուն-անտեր, դա նշանակում է, որ Հայաստանում «փորձել հասնել արդարության» Կոստանյանի բանաձևը ընդամենը բարի ցանկությունն է:

Նշենք նաև, որ Երևանի կենտրոնի իրացման գոտու սեփականատերերը «նորանկախ» օլիգարխիայի ներկայացուցիչներ են: Ստացվում է, որ Հայաստանը իր բյուջեից վճարում է օլիգարխիային Երևանը ապամշակութայնացնելու համար, իսկ Եվրադատարանի ճնշման տակ վճարում է օլիգարխիայի զոհերին:

Կարելի էր ենթադրել, որ Եվրադատարանի համանման որոշումները զսպիչ ազդեցություն պետք է ունենային օլիգարխիայի վրա Երևանի կենտրոնը ապաազգայնացնելու համար, պետք է նաև ազդեին կառավարության վրա` վերանայելու ՀՀ քաղաքացիներին անտուն-անտեղ թողնելու «իրացման գոտու» իր քաղաքականությունը:

Բայց ինչպես երևում է, Եվրադատարանի որոշումները ոչ կառավարության վրա են ազդում, ոչ էլ ՀՀ որոշ պաշտոնյաների և օլիգարխների ախորժակի, քանի որ Երևանի կենտրոնը շարունակում է լինել հանրային գերակա շահ:

Ոչ ոք իր գրպանից չի վճարում, օլիգարխներն ու նրանց զոհերը վճարվում են ՀՀ հարկատուների հաշվին, ահա թե ինչու պատկան օղակները պարզապես թքած ունեն, թե հանուն արդարության պետբյուջեից որքան գումար է վճարվում:

Ըստ պաշտոնական հաղորդագրության, ՀՀ գլխավոր դատախազ, Մարդու իրավունքների եվրոպական դատարանում ՀՀ կառավարության լիազոր ներկայացուցիչ Գևորգ Կոստանյանի գլխավորած պատվիրակությունը հունվարի 25-ից 30-ը աշխատանքային այցով մեկնել է Ստրասբուրգ, որտեղ հանդիպելու է Մարդու իրավունքների եվրոպական դատարանի նախագահ Գուիդո Ռայմոնդի և այլ բարձրաստիճան պաշտոնյաների հետ:

Այս դեպքում ի՞նչ է խոսելու Գ. Կոստանյանը Եվրադատարանի պաշտոնյաների հետ, կամ ինչպե՞ս է Հայաստանի պաշտոնյաների ընչաքաղցությունը բխեցնելու մարդու իրավունքների պաշտպանությունից: