«Արմավիր» քրեակատարողական հիմնարկը համալրվել է նորագույն ռադիոգրաֆիկ սարքով

Հայաստանի Հանրապետության արդարադատության նախարարի տեղակալ Լևոն Բալյանը և Քրեակատարողական ծառայության պետ, արդարադատության գեներալ-մայոր Սերգեյ Ատոմյանն այցելել են ՀՀ ԱՆ «Արմավիր» քրեակատարողական հիմնարկ՝ ծանոթանալու «Գլոբալ» հիմնադրամի ֆինանսական աջակցությամբ ձեռք բերված ժամանակակից ռենտգեն սարքին:

Այցին մասնակցել են նաև Ծառայության պետի առաջին տեղակալ Ամբակում Գրիգորյանը, պետի խորհրդական Անդրանիկ Սիմոնյանը, «Քրեակատարողական բժշկության կենտրոն» ՊՈԱԿ-ի տնօրեն Կամո Մանուկյանը:

Կամո Մանուկյանը տեղում ներկայացրել է բժշկական նոր սարքի տեխնիկական հնարավորությունները, այն արհեստական բանականության օժանդակությամբ առավել վաղ և արդյունավետ ախտորոշում է տուբերկուլոզը՝ մեծապես դյուրացնելով տուբերկուլոզի կասկած ունեցող շահառուների շրջանում սքրինինգի և տրիաժի իրականացումը: Այս նորագույն տեխնոլոգիայի շնորհիվ նվազագույնի է հասցվում կրծքավանդակի թվային ռադիոգրաֆիկ հետազոտության մեկնաբանման ընթացքում մարդու կողմից հնարավոր սխալների թիվը:

Բացի ախտորոշիչ ճշգրտությունից՝ սարքը նաև դյուրակիր է ստացիոնար ռադիոգրաֆիկ այլ սարքերի համեմատ․ հեշտությամբ տեղափոխվում և տեղադրվում է որևէ վայրում առանց հատուկ պայմանների պահանջի, հետևաբար անհրաժեշտության դեպքում այն կարելի է տեղափոխել նաև այլ քրեակատարողական հիմնարկներ: Այսուհետ նորագույն սարքի միջոցով տուբերկուլոզի արագ ախտորոշումը, ինչպես նաև թոքերի և այլ օրգան համակարգերի թվային ռենտգենոգրաֆիկ հետազոտությունները առավել հասանելի կդառնան ազատազրկված անձանց շրջանում:

Բուժմասում շրջայց կատարելուց հետո փոխնախարար Լևոն Բալյանը գեներալ-մայոր Սերգեյ Ատոմյանի և մյուս պաշտոնատար անձանց ուղեկցությամբ շրջել է նաև հիմնարկի ողջ տարածքում, եղել կարճատև տեսակցության և հանձնուքների ընդունման սենյակներում, բնակելի գոտում, կարանտինային բաժանմունքում, խցերում, զբոսահրապարակներում, ճաշարանում ծանոթացել է օրվա ճաշացանկին և ճաշերի պատրաստման գործընթացին: Ծառայության պետը փոխնախարարին ներկայացրել է նաև օդափոխության, օդորակման, ջեռուցման համակարգերի տեղադրման՝ ավարտին հասցվող աշխատանքները, տեսահսկման նորագույն համակարգը, ինչպես նաև վերանորոգման փուլում գտնվող սենյակները, որտեղ ազատազրկված անձինք հնարավորություն կունենան տեսակապի միջոցով զրուցել իրենց իրավապաշտպանների հետ: