Հաղթանակ կամրջի վրա կանխվել է բանկերից մեկի կառավարչի 26-ամյա որդու ինքնասպանության փորձը

Արտակարգ դեպք Երևանում։ Ժամը 18։45-ի սահմաններում ՀՀ Ներքին գործերի նախարարության փրկարար ծառայության 911 ճգնաժամային կառավարման կենտրոն ահազանգ է ստացվել, որ մի քաղաքացի անցել է Հաղթանակ կամրջի վտանգավոր եզրագիծը և սպառնում է ցած նետվել։

Ինչպես հայտնում է shamshyan.com-ը, օպերատիվորեն ժամանել են ՀՀ ՆԳՆ ՓԾ Երևանի հրշեջ փրկարական ջոկատից 1 մարտական հաշվարկ, ՓԾ ճգնաժամային կառավարման ազգային կենտրոնի օպերատիվ խումբը և ՀՀ ՆԳՆ ոստիկանության պարեկային ծառայության Երևանի գնդի 2-րդ գումարտակի պարեկները։ Օպերատիվորեն ժամանել են նաև Երևանի 103 շտապօգնության բժիշկների հերթապահ խումբը, ովքեր տեղում հերթապահություն են կատարում։ 

Պարեկները, փրկարարները և մի քաղաքացի, ով այդ պահին եղել է Օպել մակնիշի ավտոմեքենայով, մեծ դժվարությամբ կարողացել են այդ միջին տարիքի տղամարդուն դուրս բերել վտանգավոր եզրագծից անվտանգ վայր, ով այնուհետև տեղափոխվել է ոստիկանության կենտրոնական բաժին։Ոստիկանությունը պարզում է քաղաքացու ինքնությունը։ Ֆոտոլրագրողը հայտնում է, որ տեղում պարեկները և ոստիկանության կենտրոնական բաժնի օպերատիվ խումբը պարզել են, որ այդ տղամարդը Վայոց Ձորի մարզի բնակիչ՝ 26-ամյա Ա. Ա-ն է, ով այնուհետև ենթարկվել է սթափության փորձաքննության. եղել է խմածության ամենաբարձր աստիճան։ 

Գ. Շամշյանի տեղեկություններով՝ Ա. Ա-ի հայրը Հայաստանում հայտնի բանկերից մեկի մասնաճյուղի կառավարիչ է, հորեղբայրը նույնպես Հայաստանում հայտնի բանկերից մեկի մասնաճյուղի կառավարիչ է, պապն էլ նախկին գյուղապետ է։