Միջին և Մերձավոր Արևելքի հայկական համայնքներն այսօր դիմագրավում են մեծ փորձություններ. ներգաղթի տրամադրությունները մեծ են. Ալեքսանյան

Ցավոք սրտի, Միջին և Մերձավոր Արևելքի հայկական համայնքներն այսօր դիմագրավում են մեծ փորձությունների: Նախ Իրաքի հայ համայնքը, այնուհետև՝ Սիրիայի, հայտնվեցին կոնֆլիկտի մեջ: Լիբանանում սոցիալ-տնտեսական իրավիճակը բավականին ծանր է տարիներ շարունակ, իսկ այնուհետև՝ եղավ Բեյրույթի նավահանգստի պայթյունը: Իսկ այսօր արդեն՝ Մարաշի երկրաշարժը, որն ավերածություններ է գործել հատկապես Հյուսիսային Սիրիայում՝ հայկական համայնքների շրջանում, ինչպես նաև Թուրքայի հարավային և հարավ-արևելյան շրջաններում: Այս մասին այսօր լրագրողների հետ զրույցում ասաց  Սփյուռքի հանձնակատարի գրասենյակի ռազմավարությունների մշակման բաժնի պետ Հովհաննես Ալեքսանյանը:

Նրա խոսքով՝ այսօր անհանգիստ դրսևորումներ կան նաև Իսրայելի հայ համայնքի հետ կապված՝ հայտնի դեպքերով պայմանավորված, որոնք տեղի ունեցան հունվարին: Ըստ էության, Միջին և Մերձավոր Արևելքում՝ մեր համայնքներում, ճգնաժամային իրավիճակ է նկատվում, որոնք պայմանավորված են ինչպես սոցիալ-տնտեսական, քաղաքական, այնպես էլ աղետով: Եվ պատահական չէ, որ այս տարածաշրջանից ներգաղթի տրամադրությունները բավականաչափ մեծ են: 

«Սփյուռքի հանձնակատարի գրասենյակը վերջերս հեռավար հանդիպում ունեցավ Իսրայելի համ համայնքի տարբեր հաստատությունների և անհատների հետ: Անշուշտ նաև քննարկվել են այստեղ տեղ գտած բռնություններն ու հարձակումները՝ հայ անձանց և հաստատությունների վրա: Մեր համայնքային կառույցները բազմաթիվ նամակներով դիմել են Իսրայելի պատկան մարմիններին: Ցանկանում եմ նշել, որ այդ գործողություններն ուղղված չեն զուտ հայերի դեմ, այլ քրիստոնյաների: Մենք կապի մեջ ենք նաև պատրիարքարանի հետ»,- նշեց Ալեքսանյանը: