ՀՀ պատմության մեջ, միաժամանակ մեղադրյալի կարգավիճակում են հայտնվել 2007-2020թթ. պաշտոնավարած պաշտպանության բոլոր նախարարները

ՀՀ գլխավոր դատախազությունը փետրվարի 10-ին հայտնեց, որ Երևանի ընդհանուր իրավասության դատարանը բավարարել է ՀՀ պաշտպանության նախկին նախարար Վիգեն Սարգսյանի նկատմամբ կալանավորումը որպես խափանման միջոց ընտրելու միջնորդությունը։

Նա մեղադրվում է Նախարարության հաշվեկշռում գտնվող, Երևան քաղաքի Գ.Հասրաթյան փողոցի թիվ 25/6 հասցեի բազմաբնակարան շենքի բնակարանների բաշխման գործընթացում դիտավորությամբ իր լիազորությունների շրջանակից ակնհայտորեն դուրս գտնվող գործողություններ կատարելու մեջ։

«Փաստինֆո»-ի հաղորդմամբ՝ Վիգեն Սարգսյանը պաշտոնավարել է 2016-2018 թվականներին։

Մեղադրյալի կարգավիճակում է նաև նրանից հետո պաշտպանության նախարար նշանակված Դավիթ Տոնոյանը։ Նա մեղադրվում է ավելի քան 2 մլրդ գումար հափշտակելու և կեղծիքներ, հանրորեն վտանգավոր արարքներ կատարելու մեջ։ Կալանքի տակ է գտնվում 2021 թվականի սեպտեմբերի 30-ից։ Տոնոյանը պաշտպանության նախարար է եղել 2018-2020թվականներին։

Մեղադրյալի կարգավիճակ ունի նաև 2008- 2016թթ. Պաշտպանության նախարարի պաշտոնը զբաղեցրած Սեյրան Օհանյանը։ 2023 թվականի փետրվարի 8-ին խորհրդարանական մեծամասնությունը բավարարեց գլխավոր դատախազի միջնորդությունը՝ ներկայումս ընդդիմադիր խմբակցության ղեկավար Սեյրան Օհանյանի նկատմամբ քրեական հետապնդում հարուցելու համաձայնություն տալու գլխավոր դատախազի միջնորդագիրը։ Նրան մեղադրում են չգործող զորամասի տարածքը այլ անձի վաճառելու մեջ։

Իսկ Օհանյանից առաջ պաշտպանության նախարարի պաշտոնը զբաղեցրած Միքայել Հարությունյանը (2007-2008թթ) հետախուզման մեջ է գտնվում 2018 թվականի հուլիսից նրան մեղադրում են 2008 թվականի մարտի 1-ի իրադարձությունների գործով՝ սահմանադրական կարգը բռնությամբ տապապելու մեջ։