Շիրակի առաջին ատյանի ընդհանուր իրավասության դատարանի դատավոր Մակար Կիրակոսյանը կտեղափոխվի Արմավիր

Բարձրագույն դատական խորհրդի փետրվարի 8-ի որոշմամբ՝ Շիրակի մարզի առաջին ատյանի ընդհանուր իրավասության դատարանի դատավոր Մակար Կիրակոսյանը կտեղափոխվի Արմավիր։

«2023 թվականի փետրվարի 8-ին, դռնփակ նիստում, քննարկելով Արմավիրի մարզի առաջին ատյանի ընդհանուր իրավասության դատարանի դատավորի թափուր պաշտոնում առաջին ատյանի այլ դատարանի դատավորին նշանակելու վերաբերյալ հարցը և ղեկավարվելով Հայաստանի Հանրապետության

Սահմանադրության 175-րդ հոդվածի 1-ին մասի 2-րդ կետով, «Հայաստանի Հանրապետության դատական օրենսգիրք» սահմանադրական օրենքի 119-րդ և 117-րդ հոդվածներով, 89-րդ հոդվածի 1-ին մասի 9-րդ կետով և 94-րդ հոդվածի 1-ին և 5-րդ մասերով` Բարձրագույն դատական խորհուրդը

Ո Ր Ո Շ ՈՒ Մ Է

1. Հանրապետության նախագահին առաջարկել Մակար Գեղամի Կիրակոսյանի թեկնածությունը՝ Արմավիրի մարզի առաջին ատյանի ընդհանուր իրավասության դատարանի դատավորի թափուր պաշտոնում նշանակելու համար:

2. Սույն որոշման 1-ին կետով ներկայացված առաջարկի վերաբերյալ «Հայաստանի Հանրապետության դատական օրենսգիրք» սահմանադրական օրենքի 117-րդ հոդվածով սահմանված կարգով Հանրապետության նախագահի հրամանագիրն ուժի մեջ մտնելու պահից Մակար Գեղամի Կիրակոսյանի՝ Շիրակի մարզի առաջին ատյանի ընդհանուր իրավասության դատարանի դատավորի լիազորությունները համարել դադարած:

3. Սույն որոշումն ուժի մեջ է մտնում հրապարակմանը հաջորդող օրվանից»,-նշվում է որոշման մեջ:

Հիշեցնենք, որ Մակար Կիրակոսյանը Շիրակի մարզի ընդհանուր իրավասության դատարանի դատավորի պաշտոնում նշանակվել է օրերս՝ հունվարի 30-ին ՀՀ նախագահ Վահագն Խաչատուրյանի հրամանագրով, իսկ փետրվարի 7-ին տեղի է ունեցել դատավորի երդման արարողությունը։ Երդման հաջորդ օրը՝ փետրվարի 8-ին ԲԴԽ-ն որոշում է կայացրել Մակար Կիրակոսյանի թեկնածությունը Արմավիրի մարզի ընդհանուր իրավասության դատարանի դատավորի պաշտոնում առաջարկելու մասին։