Դուք բաժակ նայո՞ղ եք, թե՞ ընդդիմություն եք, այ մարդ. ես ինչ-որ պահի իսկապես ձեր դեմքերը կմոռանամ ու աթոռները կհիշեմ. Կոնջորյան

Հեռացող ընդդիմության ուրվականի ներքո մի քանի բան ունեմ ասելու... Ամեն դեպքում դեռ ընդդիմության վերջին մոհիկանները, մի քանի գործընկերներ դեռ դահլիճում են... Իր ելույթն Ազգային ժողովում այսպես սկսեց ԱԺ ՔՊ-ական պատգամավոր Հայկ Կոնջորյանը, որի ելույթի ժամանակ դահլիճում դեռ ներկա ընդդիմադիր պատգամավորները սկսեցին լքել դահլիճը:

Նրա խոսքով՝ ընդդիմությունը՝ ի գլխավորության Դաշնակցության, երեկ փորձում էր երկրաշարժի հետևանքով նաև Թուրքիային ուղղված ցավակցությունները բերել ներկայացնել հանձնաժողովի նախագաի ընտրության համատեքստում:

«Ընդհանրապես Դաշնակցության և Թուրքիայի հարաբերություններն ամենադրամատիկն են մեր պատմության ընթացքում, և ես զարմանում եմ, որ Դաշնակցությունն այսպիսի ջանասիրությամբ փորձում է խմբագրել իր պատմությունը: Օրինակ՝ Դաշնակությունն ամենաշատը հպարտանում է իր պատմությամբ: Ինչին ուզում ես կպի, դաշնակցականներն այդքան չեն նեղսրտում, բայց երբ կպնում ես Դաշնակցության պատմությանը, դաշնակցականները ծառս են ելնում: Եվ, այո՛, ես կարծում եմ, որ պետք է փորձել Դաշնակցության մասին խոսել հենց իրենց իսկ պատմությամբ և իրենց կարծիքով վառ անհատականությունների բերանով»,- ասաց Կոնջորյանն ու ընթերցեց Առաջին հանրապետության չորրորդ վարչապետ Սիմեոն Վրացյանի երեք նամակները:

Կոնջորյանն անդրադարձավ նաև Թևանյանի և Մինասյանի ելույթներին և ապա խոսեց այն մասին, որ ընդդիմությունը միշտ խոսում և հեռանում է:

«Նրանք հայտարարել էին, որ եկել են այստեղ խրամատավորվելու: Բայց իրենք նույնիսկ իրենց հայտարարած խրամատներից են թողնում ու փախչում: Սա խրամատ չէ, սա Ազգային ժողով է... Իսկապես բանականության էռոզիա է տեղի ունեցել մեր ընդդիմության հետ և դա վտանգավոր է: Դա ինստիտուցիոնալ պրոբլեմ է: Հարգելի՛ գործընկերներ, ո՞ւր եք դուք, ո՞ւր եք չկաք: Երեկ ՀՀ կառավարության հետ հարցուպատասխանն էր: Կառավարությանն ու վարչապետին հարցուպատասխանի համար տետատետ չեք գալիս հարցեր տաք, հետո հաջորդ օրը գալիս եք էստեղ ու հեռակա վարչապետի պատասխաններին եք արձագանքում: Դուք բաժակ նայո՞ղ եք, թե՞ ընդդիմություն եք, այ մարդ: Եկեք նորմալ հարցեր տվեք,  հարցերի պատասխանները լսեք, որովհետև ես ինչ_որ պահի իսկապես ձեր դեմքերը կմոռանամ ու աթոռները կհիշեմ»,- նշեց նա: