Նոր մանրամասներ՝ գիշերային ակումբում Շմայսի որդու մասնակցությամբ տեղի ունեցած ծեծկռտուքից

Փետրվարի 5-ին, ժամը 02.41-ին, ՆԳՆ ոստիկանության օպերատիվ կառավարման կենտրոն զանգած քաղաքացին հայտնել էր, որ Վարդանանց փողոցի ակումբներից մեկի մոտ ծեծկռտուք է:

Ոստիկանության Երևան քաղաքի վարչության ՀՆԳ և ՊԾ Երևան քաղաքի գնդի 4-րդ գումարտակի 1-ին վաշտի ծառայողները նշված վայրում հայտնաբերել, խուլիգանություն կատարելու կասկածանքով ձերբակալել և ոստիկանության Կենտրոնական բաժին են տարել հինգ երիտասարդի, որոնցից երկուսը՝ Երևանի, երկուսը՝ Արմավիրի մարզի Այգեկ գյուղի, մեկը՝ Վայք քաղաքի բնակիչ: Պարզվել է, որ նրանք ժամը 02.30-ի սահմաններում, բացահայտ անհարգալից վերաբերմունք դրսևորելով հասարակության նկատմամբ, վիճաբանել, հայհոյել և փոխադարձ հարվածներ են հասցրել իրար:

Երիտասարդները և կազմված փաստաթղթերը ներկայացվել են նախաքննական մարմին:

Ավելի վաղ NEWSPRESS.am-ը հայտնել էր, որ  ԱԺ նախկին պատգամավոր, Շմայս մականունով հայտնի, Առաքել Մովսիսյանի որդին՝ Դավիթ Մովսիսյանը ձերբակալվել է գիշերային ակումբներից մեկում խուլիգանության համար:

Մեր տեղեկություններով, դեպքը տեղի է ունեցել մասնավորապես Վարդանանց փողոցում գործող հայտնի «Ռոյալ» ակումբի մոտ:

Երիտասարդներից Երևանի բնակիչներ են՝ 20-ամյա Միխայիլ Մանուկյանը և 32-ամյա Արարատ Մարտիրոսյանը: Վայոց Ձորի մարզի բնակիչ է՝ 32-ամյա Տիգրան Գևորգյանը, իսկ Շմայսի որդին՝ 22-ամյա Դավիթ Մովսիսյանը՝ Արմավիրի մարզի բնակիչ է: