Հիվանդանոցում մահացել է նախկին պաշտոնյայի 28-ամյա որդին, որն իջնելով մեքենայից, կասկածելի փաթեթ էր կուլ տվել

Shamshyan.com-ի տեղեկություններով՝ այսօր` հունվարի 26-ին, «Արմենիա» ԲԿ-ի վերակենդանացման բաժանմունքում մահացել է Երևանի բնակիչ՝ 28-ամյա Հայկ Բ-ն, ում ծայրահեղ ծանր ախտորոշմամբ հիվանդանոց էին տեղափոխել ՀՀ Ներքին գործերի նախարարության Ոստիկանության պարեկային ծառայության Երևանի գնդի պարեկները, երբ նա դեպքի վայրում կասկածելի փաթեթ էր կուլ տվել, ինչի հետևանքով էլ ինքնազգացողությունը վատացել էր։ 

Հունվարի 21-ին ՀՀ Ներքին գործերի նախարարության Ոստիկանության քրեական ոստիկանության գլխավոր վարչության թմրամիջոցների ապօրինի շրջանառության դեմ պայքարի վարչությունում օպերատիվ տեղեկություններ էին ստացվել, որ Երևան քաղաքի բնակիչ 28-ամյա Հայկ Բ․-ն  իր վարած Mercedes G 500 մակնիշի ավտոմեքենայում, ինչպես նաև իր մոտ, թմրամիջոց է պահում։

Բաղրամյան պողոտայից դեպի՝ ժողովրդին հայտնի «Օբելիի թունել» տանող ճանապարհահատվածում Երևանի գնդի 3-րդ գումարտակի 3-րդ վաշտի պարեկները կանգնեցրել էին Հայկ Բ․-ի «յաշիկը», և վարորդը, իջնելով ավտոմեքենայից, ինչ-որ բան էր կուլ տվել։

Դրանից հետո նրա ինքնազգացողությունը վատացել էր, ու պարեկները շտապօգնություն էին զանգահարել, ու մինչ բժիշկների ժամանումը, պարեկներն առաջին բուժօգնությունն էին ցուցաբերել, ապա ժամանած բժիշկների հերթապահ խումբը նրան տեղափոխել էր «Արմենիա» բժշկական կենտրոն։

Հիվանդանոց մեկնած Ոստիկանության ծառայողներին բժիշկները հայտնել էին, որ նա ի վիճակի չէ կատարվածի մասին բացատրություն տալու, քանի որ գտնվում է վերակենդանացման բաժանմունքում։Արդեն հիվանդանոցում ընդունարանի բուժանձնակազմը ոստիկաններին էր ներկայացրել նրա իրերը, որոնք հայտնաբերվել էին հագուստի գրպաններից, և այնտեղ եղել էր նաև թղթով փաթեթավորված սպիտակ փոշենման զանգված` 0.62 գրամ կշռով։