Կառավարության շենքից անընդհատ մեջքից խփում են բանակին. Ավետիք Չալաբյան

Բանակի ուսերին կոտրվեց ամբողջ պատերազմի բեռը։ Կառավարության շենքի դիմաց «Համախմբում» նախաձեռնության կազմակերպած ակցիայի ժամանակ ասաց «Համախմբում» շարժման անդամ, հասարակական-քաղաքական գործիչ Ավետիք Չալաբյանը։

Նրա խոսքով, այս իշխանությունը նույնիսկ պատերազմիn չկարողացավ պատրաստվել, մեր երկրի ռեսուրսները մոբիլիզացնել։

«Այն, ինչ մենք ունեինք, կօգներ մեզ, որպեսզի կամ հաղթեինք կամ խուսափեինք պարտությունից, մենք չկարողացանք օգտվել։ Արդյունքում ծանր պարտություն կրեցինք, և այդ ծանր պարտությունը ջարդվեց բանակի ուսերին։ Համարյա 1000 սպա է զոհվել այդ պատերազմի ժամանակ»,- ասաց Չալաբյանը։

Նա ընդգծեց, որ այսքանից հետո էլ իշխանությունը քայլ առ քայլ շարունակում է ջարդել սպայակազմը, որը բանակի ողնաշարն է։

«Հարյուրավոր քրեական գործեր են հարուցված սպաների դեմ։ Փորձում են մեզ բոլորիս համոզել, որ սպաներն են պարտվել այս պատերազմում, այն դեպքում, երբ պատերազմը կռվում և պարտվում են պետություններն իրենց ամբողջ կարողությամբ։

Բանակի բազմաթիվ սպաներ ստիպված հրաժարական են տալիս, դուրս են գալիս, քանի որ հասկանում են, որ հաջորդ քրեական գործն իրենց գլխին է ջարդվելու»,- ասաց Չալաբյանը։

Նա նշեց, որ կառավարության շենքից անընդհատ խփում են բանակին մեջքից։

«Գնացեք և խոսեք սպաների հետ, իրենք այդ մասին կասեն, որ անընդհատ իրենց մեջքից են խփում։ Չգիտեն՝ ում դեմ կռվեն՝ թշնամո՞ւ, թե՞ սրանց, քանի որ վստահ չեն, որ իրենց թիկունքը պինդ է»,- ասաց հասարակական-քաղաքական գործիչը։