Մեր ժողովրդի արյան մեջ նստած է օտար մեղեդայնությունը. Մելիք Մավիսակալյան

Մեր ժողովրդի արյան մեջ նստած է օտար երգարվեստը, օտար մեղեդայնությունը։ Շատ քիչ են մնացել մարդիկ, որ հասկանում, հետաքրքրվում և սիրում են հայկական մեղեդիները, օրինակ՝ Կոմիտասին, Sputnik Արմենիայի հետ զրույցում նման կարծիք հայտնեց կոմպոզիտոր, դիրիժոր, ՀՀ ժողովրդական արտիստ Մելիք Մավիսակալյանը։
Կոմպոզիտորի խոսքով` ներկայում հայ ժողովուրդը տարված է ժամանակակից կոչվող երաժշտությամբ, որտեղ ոճային տեսակետից գերիշխում են և՛ արաբական, և՛ թուրքական, և՛ ադրբեջանական նոտաները։

«Ժամանակին, երբ ես ռադիոյում աշխատում էի, խստագույն արգելք էր դրված, որ նման երաժշտությունը հանկարծ չմտնի ռադիո, չհնչի ռադիոյով։ Դրա մեջ մեծ դեր կատարեց այն ժամանակվա երաժշտական գլխավոր խմբագիր Արմեն Հովհաննիսյանը. ամեն ինչ արեց, որ մաքրվի դա, մնա զուտ հայկականը»,–ասաց Մավիսակալյանը։
Նա ցավով նշում է, որ այսօր` այդ արգելքները հանելուն զուգահեռ ռադիոն և հեռուստատեսությունը մարդիկ են գրավել, որոնց նախկինում արգելված էր անգամ այդ հաստատությունների կողքով անցնել։

Կոմպոզիտորներն էլ մերօրյա իրականությունում չեն կարողանում աշխատել, որովհետև նրանց ստեղծագործությունների պահանջը չկա, ինչպես, օրինակ, խորհրդային ժամանակներում էր, երբ կար պահանջարկ, կային ստեղծագործությունների պատվերներ, որը կազմակերպվում էր պետական ձևերով և պետական միջոցներով։

«Հիմա ստեղծագործությունը փող չի բերում, հիմա միայն «ռաբիս» երաժշտությունն է, որը ժողովրդի մեջ շատ տարածված է»,–նշեց կոմպոզիտորը։
«Ռաբիսի» հանդեպ համատարած այդ պահանջարկը, Մավիսակալյանի խոսքով, հանգեցրել է նրան, որ հարևանները արդեն բողոքում են, թե հայերն իրենց երաժշտությունն են վերցրել։

«ժողովուրդն ընդունում է այդ ամենը. երբ միացնում ես հեռուստացույցը՝ արաբաթուրքական ռիթմերով, մելիզմներով երաժշտություն է։ Ալիքներ կան՝ առավոտից երեկո այդ երաժշտությունն են հաղորդում։ Ես ելք չեմ տեսնում, հույս չունեմ, որ որևէ բան կարող է փոխվի, մեր հայկականը կա, բայց այն այդքան մեծ տարածում չունի»,–ընդգծեց դիրիժորը։

Նյութն ամբողջությամբ՝ սկզբնաղբյուր կայքում