«Ինչո՞ւ պիտի Պապիկյանը հրաժարական տա, եթե 44–օրյա պատերազմից հետո Փաշինյանն իշխանությունից չհեռացավ»․ Բենիամին Մաթևոսյան

Երբ դասակի հրամանատարը լրագրողների հետ զրույցում ասում է, որ բանակում բարդակ է տիրում, այդ բարդակը կառավարման արդյունք է։ Այս մասին լրագրողների հետ զրույցում ասաց է քաղաքագետ Բենիամին Մաթևոսյանը՝ անդրադառնալով Գեղարքունիքի զորամասերից մեկի վաշտում տեղի ունեցած պատճառահետևանքային խնդիրներին ու դրա հետ կապված իշխանությունների իրարամերժ արձագանքներին։

Նա նշեց, որ հրդեհի պատճառների հետ կապված խառնաշփոթ և իրարամերժ վարկածները հենց կառավարման ցածր մակարդակի մասին են խոսում։

«Եթե դու վարկածները, այսպես ասած, ջրի երես չհանես, թողնես, որ հասարակությունն ինքնահոսով եզրահանգումներ անի, ապա տրամաբանական է, որ մարդիկ գալու են այն եզրակացության, որ խնդիրը քաղաքական է և կառավարման որակից է բխում։ Այդ ամեն ինչն ուղղորդելու համար դու վարկածներ ես առաջ բերում, որը կպավ՝ կպավ»,-ասաց Բենիամին Մաթևոսյանը։

Նրա դիտարկմամբ՝ խնդիրը հենց այդտեղ է ու երբ հակառակ դաշտից կարծիքներ չեն հնչում ու ճնշումներ չեն լինում, ապա իշխանությունն անում է այն, ինչ հարմար է գտնում։

Դիտարկմանը, թե Սուրեն Պապիկյանն այդպես էլ դեպքի վայր չայցելեց, և շատերը պահանջում են նրա հրաժարականը, Բենիամին Մաթևոսյանն արձագանքեց․ «Ինչո՞ւ պիտի Սուրեն Պապիկյանը հրաժարական տա, եթե 44–օրյա պատերազմից հետո Փաշինյանն իշխանությունից չհեռացավ։ Իշխանության բոլոր պաշտոնյաներն էլ ձախողումից հետո շարունակում են իրենց պաշտոնավարումը»,- ասաց նա։

Ինչ վերաբերում է դիտարկման այն հատվածին, թե Պապիկյանը մինչ օրս չի այցելել զորամաս, ապա քաղաքագետը հարցով է արձագանքում․ «Էհ այցելեր՝ ի՞նչ էր փոխվելու։ Խնդիրը մաքուր քաղաքական խնդիր է ու սրա հանգուցալուծումը քաղաքական պետք է լինի, որը Սուրեն Պապիկյանի հրաժարականի մեջ չէ»։

Ըստ նրա, եթե մինչ այս ոչ ոք իր ձախողման համար հրաժարական չի տվել ու պատասխանատվության չի ենթարկվել, ապա Սուրեն Պապիկյանի հրաժարականը խնդրի լուծմանը չի օգնի։