Մենք պատրաստ ենք հանդիպել Միրզոյանի և Լավրովի հետ. Բայրամով

Հայաստանը խուսափում է խաղաղ բանակցություններից, լրագրողներին ասել է Ադրբեջանի արտգործնախարար Ջեյհուն Բայրամովը։

Նրա խոսքով՝ Ադրբեջանը նախաձեռնել է խաղաղության օրակարգ և նպատակ ունի շարունակել բանակցությունները։

«Հայաստանը պետք է հասկանա, որ խաղաղ գործընթացի զարգացումն իր համար պակաս կարևոր չէ, քան Ադրբեջանի համար: Եվ եթե Երևանը դա չի հասկանում, ապա սա շատ սխալ քաղաքականության բացահայտ ցուցադրում է»,- ասել է արտգործնախարարը: 

Բայրամովը նշել է, որ Հայաստանը հրաժարվել է մասնակցել մոսկովյան բանակցություններին, ինչը նաև բանակցային գործընթացը տանում է դեպի փակուղի։

«Սա Երևանի անպատասխանատու քաղաքականության ևս մեկ օրինակ է»։

Արտգործնախարարի խոսքով՝ Ադրբեջանը «հավատարիմ է» մնում բանակցություններին։

«Մենք պատրաստ ենք Ադրբեջանի, Հայաստանի և Ռուսաստանի արտգործնախարարների վաղաժամ հանդիպմանը»,- ասել է նախարարը։

--------------------------------

Մեր կողմից ընթերցողին հիշեցնենք միայն, որ բանակցությունների հավատարիմ լինելուց և խաղաղության օրակարգից խոսում է մի մարդ, որի պետությունը նույնիսկ նոյեմբերի 9-ի հայտարարությանը հավատարիմ չի մնացել և չի վերադարձրել հայ ռազմագերիներին: Խաղաղությունից խոսում է մի մարդ, որը արդեն 40 օր է՝ ռազմական գործողություն է սանձազերծել 120 հազար հայ խաղաղ բնակչի նկատմամբ՝ ենթարկելով բլոկադայի, անջատելով գազն ու կտրելով էլեկտրաէներգիան սնուցող լարերը (բլոկադան ռազմական գործողության տեսակ է-հեղ.):