Ե՞րբ հասցրեցին պարզել այդ ամենը, քաղաքական այրերը շատ են շտապում փակել այս թեման՝ դրանով խորացնելով կասկածները, որ ինչ-որ բան սխալ է և սուտ․ Ղազինյան

Քաղաքական գործիչ Արթուր Ղազինյանը ֆեյսբուքյան իր էջում գրառում է արել՝ խոսելով Գեղարքունիքի մարզի զորանոցներից մեկում տեղի ունեցած ողբերգական իրադարձության մասին։

Գրառումը ներկայացնում ենք ստորև․ «Տեղի է ունեցել հրդեհ, որի հետևանքով զոհվել են 15, իսկ ծանր այրվածքներ են ստացել երեք զինծառայող: Նման իրավիճակում հարուցվում է քրեական գործ, ստեղծվում է քննչական խումբ, ներգրավվում են համապատասխան փորձագետներ և սկսվում է լրիվ, բազմակողմանի և օբյեկտիվ նախաքննություն:

Քննչական խմբի ղեկավարը հանրությանը տրամադրում է տեղեկատվություն` աղետի հնարավոր պատճառների, առաջ քաշված վարկածների և ձեռք բերված տվյալների վերաբերյալ` իր հայեցողությամբ ու ծավալով:

Իսկ ինչպես ե՞ն վարվում Հայաստանում. աղտից մի քանի ժամ հետո քաղաքական մարմիններն ու պաշտոնատար անձիք համոզված դեմքով հայտարարում են աղետի պատճառի ու մեղավորների մասին, զբաղեցրած պաշտոններից ազատում բարձրաստիճան զինվորականներին:

Այդ ե՞րբ հասցրեցին պարզել այդ ամենը, ո՞ւր է քրեական գործը, ո՞ւր է քննչական խումբը, ուր ե՞ն ցուցմունքները, քննչական գործողությունները, դեպքի վայրի զննությունը, ապացույցները, փորձաքննության տվյալներն ու արդյունքները, ո՞նց որոշեցին, որ մեղավորներ կան ու ո՞նց գտան նրանց:

Չգիտեմ, չեմ կարող ասել, բայց մի բան ակնհայտ է. շտապում են, շատ են շտապում քաղաքական այրերը փակել այս թեման ու դրանով ավելի են խորացնում կասկածներն առ այն, որ ինչ որ բան սխալ է, սուտ է»: