Այսօր Առնո Բաբաջանյանի 95 ամյակն է

«Ինչ էլ գրեմ՝ ստացվում է հայեցի»: Ահա այսպիսին էր, մեր արվեստի մեծաշնորհ ներկայացուցիչներից մեկի՝ Առնո Բաբաջանյանի խորհրդանշական խոստովանությունը:  Հարկ է նշել նաև, որ Առնո Բաբաջանյանի ստեղծագործական հարուստ ժառանգությունը ներառում է երգեր, գործիքային կատարումներ, սիմֆոնիկ երաժշտություն։ Բաբաջանյանը ստեղծագործել է տարբեր ոճերով՝ դասական, պոպ, ջազ։

Հայ երաժշտության հսկաներից մեկը՝ Առնո Բաբաջանյանը ծնվել է 1921թ-ի  հունվարի 22-ին Երևանում։ Իր առաջին երաժշտական ստեղծագործությունը գրել է 9 տարեկան հասակում։ 1938 թվականին մեկնել է Մոսկվա և միանգամից ընդունվում է Գնեսինների անվան երաժշտական քոլեջի վերջին կուրսը։ Այն ավարտելուց հետո ընդունվել է  Պյոտր Չայկովսկու անվան ՄՊԿ ( Բ. Մ. Բեռլինի  դաշնամուրի դասարան)։

Նրա տաղանդը նկատել է անգամ ինքը` Արամ Խաչատրյանը: Բաբաջանյանի ստեղծագործական յուրօրինակ ոճը ձևավորվել է հանրահայտ կոմպոզիտորներ Արամ Խաչատրյանի և Սերգեյ Ռախմանինովի ազդեցությամբ: Բաբաջանյանի ստեղծագործական անհատականությունը դրսևորվել է հատկապես դաշնամուրի և նվագախմբի համար գրված «Հերոսական բալլադում», ապա՝ դաշնամուրային տրիոյում: Մեր օրերում արդեն լեգենդ դարձած Բաբաջանյանը գրել է  նաև երաժշտություն  «Առաջին սիրո երգը», «Երջանկության մեխանիկան», «Հարսնացուն հյուսիսից» և այլ ֆիլմերի համար, որոնք մեծ սեր են վայելում ժողովրդի կողմից: Որպես դաշնակահար` Բաբաջանյանն աչքի է ընկել հատկապես սեփական ստեղծագործությունների կատարմամբ:

Այսօր ` Բաբաջանյանի ծննդյան առթիվ, ՀՀ մշակույթի նախարարության ներկայացուցիչները, արվեստասերները և մտավորականներն,  այցելել են Երևանի կենտրոնական գերեզմանատուն` հարգանքի տուրք մատուցելով կոմպոզիտորի հիշատակին: 20-րդ դարի հայ կոմպոզիտորական արվեստի հսակներից մեկը՝ Առնո Բաբաջանյանը, կդառնար 95 տարեկան: