Պերմյակովն իրեն ամեն ինչում մեղավոր ճանաչեց

Գյումրիում տեղակայված ռուսական 102 ռազմաբազայում ընթանում է Ավետիսյանների ընտանիքի սպանության գործով երրորդ արտագնա դատական նիստը։ Տուժողների իրավահաջորդները միջնորդություն ներկայացրեցին, որ հայկական կողմը Ռուսաստանից պահանջի սպանության մեջ մեղադրվող Վալերի Պերմյակովի քրեական գործի հետ կապված բոլոր փաստաթղթերը և կցի ընթացող գործի փաստաթղթերին:

Դատավորը միջնորդությունը հետաձգեց մինչև գործի քննության ավարտ:

Իրավահաջորդների շրջանում երկարաձգման փաստը վրդովմունք առաջացրեց:

Փաստաբան Լուսինե Սահակյանը վրդովված դիմեց դատարանին. «Ես չեմ հասկանում՝ դուք ո՞ւմ շահն եք փորձում պաշտպանել»,-ասաց Լուսինե Սահակյանը:

Ամեն դեպքում դատը շարունակվեց: Դատախազը կարդաց մեղադրական եզրակացությունը: Դատավորի հարցին, թե արդյո՞ք ամբաստանյալ Վալերի Պերմյակովն իրեն մեղավոր ճանաչում է, վերջինս դրական պատասխան տվեց:
Հաջորդ հարցին, թե կոնկրետ ինչո՞ւմ է մեղավոր ճանաչում, Պերմյակովն ասաց. «Ամեն ինչում»:

Նկատենք, նաև, որ Ավետիսյանների իրավահաջորդները միջնորդություն ներկայացրեցին, որ դատաքննության ժամանակ վկաների կողմից տրված ցուցմունքները ուղիղ եթերով չհեռարձակվեն:
Այսինքն ՝ լինի միայն պատկերը, իսկ ձայնը՝ ոչ:

Սա արվեց նրա համար, որ նրանք, ովքեր դեռևս պետք է ցուցմունք տան՝ չլսեն, թե ինչ փաստական հանգամանքների մասին է խոսվել:
Այս պահին նիստն ընթանում է սովորական հունով: Դատարանը լսում է գործով առաջին վկայի՝ Ավետիսյանների ընտանիքի հարազատ՝ Ռիտա Պետրոսյանի ցուցմունքը:

Նկատենք, որ դատական նիստը երկու անգամ ընդմիջվել է Ավետիսյանների հարազատներից մեկի ինքնազգացողության վատացման պատճառով: