Աննա Մկրտչյանի անվամբ հաշվառված մեքենան վրաերթի է ենթարկել մի կնոջ. ՔԿ-ն մանրամասներ է ներկայացրել

Աննա Մկրտչյանի հայտարարության մեջ արված մեկնաբանություններն իրական հիմք չունեն։ Այս մասին NEWS.am-ի հետ զրույցում ասաց Քննչական կոմիտեի նախագահի մամուլի քարտուղար Գոռ Աբրահամյանն՝ անդրադառնալով ԱԺ «Պատիվ ունեմ» խմբակցության պատգամավոր Աննա Մկրտչյանի ֆեյսբուքյան ուղիղ եթերում արված հայտարարությանը, թե վարչապետ Նիկոլ Փաշինյանին ազդանշան տալու պատճառով քրեական վարչությունը եկել է իր մեքենայի հետեւից։

«Իրականությունն այն է, որ 2023թ. հունվարի 10-ին՝ ժամը 08։05-ին, Աստղիկ ԲԿ-ից ահազանգ է ստացվել, որ Երևան քաղաքի Շերամի փողոցում տեղի է ունեցել վրաերթ, որի հետեւանքով մարմնական վնասվածքներ է ստացել եւ բուժօգնության դիմել մի կին։

Դեպքի առթիվ ՀՀ քննչական կոմիտեի Երեւան քաղաքի քննչական վարչության ՃՏՀ քննության բաժնում ՀՀ քրեական օրենսգրքի 342-րդ հոդվածի 1-ին մասով նախատեսված հանցագործության հատկանիշներով նախաձեռնվել է քրեական վարույթ, որի նախաքննության ընթացքում օպերատիվ տեղեկություններ են ստացվել, որ անձը վրաերթի է ենթարկվել «Կիա» մակնիշի համապատասխան հաշվառման համարանիշով ավտոմեքենայի կողմից, որի վարորդը դիմել է փախուստի։

Վարույթն իրականացնող մարմնի կողմից հանձնարարություն է տրվել հիշյալ ավտոմեքենան տեղափոխել ՀՀ ՆԳՆ ոստիկանության հատուկ պահպանվող տարածք։ Քննությամբ պարզվել է, որ այդ համարանիշով ավտոմեքենան հաշվառված է ՀՀ ԱԺ պատգամավորի անվամբ, և պարզապես Ոստիկանության աշխատակիցների կողմից իրականացվել են տրված հանձնարարության կատարումն ապահովելուն ուղղված գործողություններ»,– ասաց Գոռ Աբրահամյանը։

Հարցին՝ արդյոք պատգամավորը կասկածվում է վրաերթ կատարելու մեջ, Քննչական կոմիտեի նախագահի մամուլի քարտուղարն ասաց. «Քննությունը դեռ նախնական փուլում է, դեպքի բազմաթիվ հանգամանքներ պետք է ստուգվեն, պարզվեն, այդ թվում՝ վրաերթի պահին ավտոմեքենայի վարորդի ինքնության պարզման առումով։ Դեռևս խիստ վաղաժամ է խոսել կոնկրետ անձի վերաբերյալ կասկածանքի առկայության մասին»։