Ֆրանսիան պատրա՞ստ է Արցախում փոխարինել ռուս խաղաղապահներին. հարց՝ Ֆրանսիայի ԱԺ նախագահին (տեսանյութ)

Ադրբեջանի և Հայաստանի սահմանին կա դիտորդական խումբ, որը տեղակայվել է սահմանի երկայնքով․ հույս ունենք, որ ևս մեկ առաքելություն կարող ենք բերել և տեղակայել։ Այս մասին ՀՀ և Ֆրանսիայի խորհրդարանների նախագահների համատեղ ասուլիսի ժամանակ ասաց Ֆրանսիայի ԱԺ նախագահ Յաել Բրաուն-Պիվեն՝ պատասխանելով լրագրողի հարցին, թե արդյոք Ֆրանսիան պատրա՞ստ է փոխարինել ռուս խաղաղապահներին Արցախում։

Միևնույն ժամանակ Բրաուն-Պիվեն նկատեց, որ առաքելության տեղակայումը Ֆրանսիայի դիրքորոշումն է, սակայն այդ ցանկությունը պետք է համընկնի․ հարկավոր է որ Եվրամիության անդամ պետությունների տեսակետը համընկնի այդ դիրքորոշմանը։

Ինչ վերաբերում է փաստահավաք խմբի տեղակայմանը, ապա Ֆրանսիայի ԱԺ նախագահը նշեց, որ չգիտի, թե արդյոք Հայաստանը այդ խնդրով դիմե՞լ է Ֆրանսիային, թե՞ ոչ։

«Երբ Ուկրաինան դիմեց մեզ նման հարցով, Ֆրանսիան ուղարկեց փաստահավաք խումբ, սակայն այս դեպքում չգիտեմ՝ արդյոք Հայաստանը դիմե՞լ է Ֆրանսիային»,- ասաց նա։

Լրագրողը հարցը հստակեցրեց, որ խոսքը Լաչինի միջանցք փաստահավաք խումբ ուղարկելու մասին է, ինչին պատասխանեց ԱԺ նախագահ Ալեն Սիմոնյանը՝ Լաչինի միջանցք փաստահավաք խումբ ուղարկելու համար հարկավոր է նաև Ադրբեջանի համաձայնությունը։

«Ֆրանսիան մեզ պետք է՝ որպես միջնորդ, այլ ոչ թե որպես կողմ»,- ասաց նա՝ հավելելով, որ առանց այն էլ Ֆրանսիան բավականին օգնում է մեզ։