Արարատ Միրզոյանի չեղարկված այցը, խանգարեց կարգավորել հրատապ հարցեր. այդ թվում՝ Լաչինի ճանապարհի շուրջ ստեղծված իրավիճակը. Մարիա Զախարովա

Հայաստանի ղեկավարությունը վերջին պահին չեղարկել է Հայաստանի արտգործնախարար Արարատ Միրզոյանի այցը, ինչը թույլ չի տվել քննարկել հայ-ադրբեջանական հարաբերությունների կարգավորման հրատապ հարցերը։

Այս մասին հայտարարել է Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան՝ ի պատասխան մամուլի այն հարցին, թե հայկական կողմը պատրա՞ստ է ռուսական առաջարկների հիման վրա փաստաթուղթ ստորագրել ղարաբաղյան հիմնախնդրի կարգավորման վերաբերյալ։

«2022 թվականի դեկտեմբերի 23-ին Մոսկվայում նախատեսված էր Հայաստանի և Ադրբեջանի ԱԳ նախարարների հանդիպումը խաղաղության պայմանագրի շուրջ։ Երկու երկրների ղեկավարները համաձայնել են դրան։ Դրա համար ամեն ինչ պատրաստված էր։ Բայց Հայաստանի ղեկավարությունն էր, որ վերջին պահին չեղարկեց Հայաստանի արտգործնախարար Արարատ Միրզոյանի այցը։ Դա մեզ խանգարեց քննարկել ոչ միայն խաղաղության պայմանագիրը, այլ նաև հայ-ադրբեջանական հարաբերությունների կարգավորման այլ հրատապ հարցեր, այդ թվում՝ Լաչինի ճանապարհի շուրջ ստեղծված իրավիճակը»,- ​​ասել է Զախարովան։

Նա նշել է, որ եթե հայ գործընկերներն իսկապես շահագրգռված են բացահայտված խնդիրները լուծել ամենաբարձր մակարդակով եռակողմ համաձայնագրերի համապարփակ իրականացմանը համահունչ, ապա  անհրաժեշտ է շարունակել համատեղ աշխատանքը։

«Խաղաղության պայմանագրի շուրջ հայ-ադրբեջանական բանակցությունների համար հարթակ տրամադրելու ռուսական առաջարկը մնում է ուժի մեջ»,- հավելել է Զախարովան։