Վրաստանն ընդունելու է «Գազպրոմ»-ի պահանջները. վրացագետ

Ռուսական «Գազպրոմ» ընկերության և Վրաստանի էներգետիկայի նախարարության միջև բանակցություններ են ընթանում: Ռուսական կողմն առաջարկել է վրացական կողմով Հայաստան տարանցիկ գազամուղից ոչ թե 10 տոկոսը ստանա, այլ դրամային փոխհատուցում:

Newspress.am-ին խնդրի առնչությամբ վրացագետ Ալիկ Էրոյանցը մանրամասնեց, որ ռուս-վրացական բանակցություններն արդեն երկար ժամանակ է Վրաստանի ներքաղաքական դաշտը լարված են պահում, և արդյունքը չի երևում:

Նա նաև նշեց, որ Վրաստանի թե՛ խորհրդարանական, թե՛ արտախորհրդարանական ընդդիմությունը խիստ քննադատության է ենթարկում կառավարության գործելաոճը, մասնավորապես էներգետիկայի նախարար Կ.Կալաձեինը` փակ բանակցությունների համար: Այնուհանդերձ Կալաձեն ներկայացրել է որոշ մանրամասներ, որոնց համաձայն, «Գազպրոմ»-ի ղեկավարությունը վրացական կողմին խիստ պահանջ է ներկայացրել` Վրաստանի տարածքով Հայաստանին մատակարարվող բնական գազի դիմաց ռուսական ընկերությունը այսուհետ վճարելու է ոչ թե գազի ծավալի 10 տոկոսը, այլ դրամային վճարով:

«Ռուսների առաջարկը չընդունելու դեպքում «Գազպրոմ»-ը սպառնում է դադարեցնել Վրաստանի միջով գազամատակարարումը Հայաստանին, և փոխարենը իրանական գազով լուծել այդ խնդիրը»,- ասաց վրացագետը, հավելելով, որ այս դեպքում Վրաստանը կկորցնի ոչ միայն ՌԴ-ից ստացվող գազը, նաև տրանզիտային գումարները:

Ալիկ Էրոյանցը հավատ չի ընծայում Իլհամ Ալիևի այն հայտարարությանը, որ Ադրբեջանն ամբողջությամբ կարող է ապահովել Վրաստանի գազի պահանջարկը և Ադրբեջանից Վրաստան եկող գազամուղի թողունակությունը չի բավարարի հատկապես ձմռան ամիսներին Վրաստանի գազապահովությունը:

Վրացագետը կարծում է, որ այնուամենայնիվ Վրաստանն ընդունելու է «Գազպրոմ»-ի պահանջները` կամ կնվազի տրանզիտային 10 տոկոսի չափը կամ կոնկրետ վճար կհաստատվի: