Կարող ենք «Խաղաղության պայմանագիր» ստորագրել, բայց մի օր կամ երեք օր հետո կարող է նոր ռազմական էսկալացիա լինել․ Փաշինյան

Կարմիր գիծը կլինի այն, որ «Խաղաղության պայմանագրի» տեքստը չհամապատասխանի ՀՀ-ի պետական շահերին։ Նման կերպ արձագանքեց Նիկոլ Փաշինյանը՝ պատասխանելով այն հարցին, թե որն է այն կարմիր գիծը, որի պատճառով ինքը չի ստորագրի «Խաղաղության պայմանագիրը»։

Լրագրողի դիտարկմանը, թե արդյոք կա՞ նման փաստաթուղթ, Փաշինյանը հավաստիացրեց, որ եթե լիներ այդպիսի փաստաթուղթ, ապա ինքը կասեր, որ արդեն ստորագրել է կամ վաղը պատրաստվում է ստորագրել։

«Մենք մեր առաջարկներն ուղարկել ենք Ադրբեջանին, բայց դեռ պատասխան չենք ստացել։ Ես ասել եմ, որ պատրաստ ենք ստորագրել և ասել եմ, որ պատրաստ ենք ամեն ջանք գործադրել, որ ստորագրենք։ Ես դա այսօր էլ եմ ասում։ Մեզնից կախված ամեն ինչ կանեմ, որ ստորագրենք «խաղաղության» փաստաթուղթ։ Ես ասում եմ՝ եթե սեղանին փաստաթուղթ լինի, որը մենք պատրաստ ենք ստորագրել, ապա դա ոչ թե վատ լուր կլինի, այլ լավ լուր։ Որովհետև դա նշանակում է, որ մեզ հաջողվել է գալ մի կետի, որ ՀՀ-ի շահերը պաշտպանվում են։ Հիմա արդեն պրոբլեմը ոչ թե նյութի բովանդակություն է, այլ թղթի բովանդակության իրագործման մեխանիզմը։ Եվ նոյեմբերի 9-ին էլ մենք ստորագրած թուղթ ունենք, բայց փաստն այն է, որ այն չի կատարվում։ Ասենք միայն թուղթ ստորագրելը բավարար չէ։ Երբ ես ժամանակին ասում էի, որ պրոբլեմը «Խաղաղության պայմանագիր» ստորագրելը չէ միայն, այլ դրա իրագործելը։ Ու մենք կարող ենք «Խաղաղության պայմանագիր» ստորագրել, բայց մի օր կամ երեք օր հետո կարող է նոր ռազմական էսկալացիա լինել։ Անունը դնենք «Խաղաղության պայմանագիր» և ստորագրենք։ Տեքստն էլ կատարյալ չի լինելու։ Էս գլխից էլ եկեք բոլորս դա հասկանանք։ Բայց ինքը կարող է համապատասխանել ՀՀ-ի բալանսավորված շահերին»,- նշեց Փաշինյանը։

Ըստ նրա՝ ամեն ինչ այդքան էլ հեշտ ու պարզ չէ։ Ավելին, կուզեր լիներ այդպիսի փաստաթուղթ և այսօրվա ասուլիսը լիներ այդ պայմանագրի դրույթների մասին։ Եվ դա վատ է, որ չկա։ Եվ այստեղ ևս մենք պետք է մեր դիտանկյունը փոխենք։

«Նոյեմբերի 9-ի եռակողմ հայտարարությունն այդ իրավիճակում ստորագրված փաստաթուղթ է։ Նորից եմ ասում՝ այդ իրավիճակում մենք բոլորս պատրաստ էինք հրդեհել (բոլորս չէ) այդ թուղթը։ Բայց տեսեք՝ մենք հիմա այդ թղթին ենք հղում անում, որ տեսեք՝ գերիները պետք է վերադարձվեն, Լաչինի միջանցքը պետք է բացվի։ Բայց հիմա այլ խնդիր է։ Եվ միշտ չէ, որ ստորագրված թուղթն իրագործվում է»,- նշեց Փաշինյանը։