Փաշինյանը՝ հայ-թուրքական հարաբերությունների և սահմանների բացման մասին

Այո՛, Թուրքիան հայտարարեց օդային բեռնափոխադրումների արգելքը վերացնելու մասին։ Եվ պիտի ասեմ, որ դա համարում եմ ողջունելի քայլ այն առումով, որ կարևոր են ոչ միայն Թուրքիայի և Հայաստանի բանակցությունները, այլ նաև իրադարձությունները, դինամիկան բանակցություններում։ Այս մասին մամուլի ասուլիսի ժամանակ հայտարարեց Նիկոլ Փաշինյանը։

Նրա խոսքով՝ այդ ամենը կարևոր է հատուկ ներկայացուցիչների աշխատանքի համար։ Նաև Թուրքիայի նախագահի հետ հեռախոսազրույց ու հանդիպում է տեղի ունեցել Պրահայում։ Կարևոր է, որ դինամիկա ունենանք հարաբերություններում։ 

«Հույս ունեմ, որ առաջիկայում երրորդ երկրների քաղաքացիների համար կբացվի սահմանը, ինչպես նաև ակնկալվում է դիվանագիտական անձնագրեր ունեցողների համար սահմանի բացում։ Այս իրադարձությունները կարևոր են ոչ միայն Հայաստան-Թուրքիա հարաբերությունների առումով, այլև միջազգային լոգիստիկ շղթաների շատ լուրջ փոփոխություն է տեղի ունենում։ Եվ կարծում եմ, որ այս տարածաշրջանը միջազգային բեռնափոխադրումների առումով շատ ավելի հետաքրքիր է դառնում, քան նախկինում և միջազգային կարևորություն է ստանում։ Այս իմաստով, իհարկե, Հայաստանի և Թուրքիայի միջև սահմանի բացումը և հայ-թուրքական երկաթուղու բացումը, շատ ավելի գլոբալ նշանակություն է ստանում։ Եվ ես հույս ունեմ, որ մենք հնարավորություն կունենանք շարունակելու այս ճանապարհով»,- նշեց Փաշինյանը։