ԵՊՀ աշխատակիցները կկարողանան օգտվել առողջության ապահովագրության նոր փաթեթից

2023 թվականի հունվարի 1-ից ուժի մեջ կմտնի Երևանի պետական համալսարանի և «Արմենիա ինշուրանս» ապահովագրական ընկերության միջև կնքված առողջության ապահովագրության ծառայությունների մատուցման նոր պայմանագիրը:

Համալսարանն ապահովագրական ընկերությանը տրամադրել է 1860 աշխատողի տվյալներ: ԵՊՀ-ն յուրաքանչյուր աշխատակցի համար տարեկան վճարելու է 86.700 դրամ, իսկ ապահովագրական ծածկույթը կազմելու է մինչև 6 մլն դրամ:

«Արմենիա ինշուրանս» ապահովագրական ընկերությունը շարունակում է առողջության ապահովագրության ծառայություններ մատուցել ոչ միայն ԵՊՀ աշխատակիցներին, այլև նրանց ընտանիքի անդամներին՝ առավել բարելավված պայմաններով: Պայմանագրով սահմանված կարգով ապահովագրությունից կարող են օգտվել նաև ԵՊՀ աշխատակիցների ընտանիքի անմիջական անդամները՝ մինչև 21 տարեկան զավակ(ներ), մինչև 65 տարեկան ամուսին/կին, ծնողներ: Նույն ընտանիքից 3 և ավելի անդամի միաժամանակյա ապահովագրության դեպքում կգործի 10% զեղչ:
ԵՊՀ աշխատակիցների համար ձեռք բերված առողջության ապահովագրության նոր փաթեթն առաջարկում է լավագույն պայմաններ բժշկական ծառայությունների լայն շրջանակով՝ քրոնիկ հիվանդությունների բուժում, դեղորայք և բժշկական պարագաներ, ակնաբուժական ծառայություն և այլն: Ներառված է նաև ատամնաբուժությունը: Փաստենք, որ 2022 թվականին ԵՊՀ աշխատակիցներն ապահովագրության փաթեթի միջոցով օգտվել են առավելապես ատամնաբուժական, ակնաբուժական ծառայություններից և անցել տարեկան պրոֆիլակտիկ զննում:

Բուհի համար կարևոր է ըստ արժանվույն գնահատել իր աշխատակիցների կատարած աշխատանքը, իսկ նրանց առողջության ապահովագրությունը աշխատանքի որակի բարձրացման և ոգեշնչման կարևոր միջոց է:

Առողջության ապահովագրությունից օգտվելու կարգին և այլ մանրամասների ծանոթանալու համար կարող եք դիմել ԵՊՀ անձնակազմի կառավարման բաժին: