Վարչապետի մարզում խնդիրներն «աչքաթող» են արվում

Արարատի մարզի Նիզամի համայնքն ունի ճանապարհների վերանորոգման, խմելու և ոռոգման ջրի, մշակույթի, մանկապարտեզի և դպրոցի վերանորոգման խնդիրներ:

Newspress.am-ին Նիզամիի համայնքապետ Հարություն Կարապետյանը տեղեկացրեց, որ 2015թ-ի դեկտեմբերին Արարատի մարզպետարանը հաստատել է դպրոցի վերանորոգման դիմումը և տրամադրել 20 մլն դրամ, որի շրջանակներում կարող են փոխել դպրոցի դռներն ու լուսամուտները, իսկ դպրոցի հիմնանորոգման համար ավելի մեծ գումարներ են անհրաժեշտ:

Նա նաև հիշեցրեց, որ դպրոցը խորհրդային տարիներին է կառուցվել, իսկ վերջին տարիներին որևէ վերանորոգման չի ենթարկվել, փոխվել է միայն տանիքը:

Հարցին, թե դժգոհություններ են կապված նաև դպրոցի հատակի հետ, քանի որ մաշված հատակի վրա տեղ-տեղ խոռոչներ են առաջացել, կրկնեց, որ 20 մլն դրամի շրջանակներում կարող են միայն դուռ ու լուսամուտ փոխել, գոնե դասասենյակները տաք կլինեն:

Ինչ վերաբերում է ճանապարհների վերանորոգմանը, նշեց, որ ցավոտ հարց է, այս տարի համայնքապետարանի միջոցներով կփորձեն որոշ ճանապարհահատված վերանորոգել, իսկ մշակույթի տան վերանորոգման համար համայնքը միջոցներ չունի, նվիրատուներ են պետք:

«Նիզամի համայնքի միակ լուսավոր կետը ոռոգման ջրի համակարգն է, այստեղ խնդիրը լուծված է, 154 հազար դոլարի ծրագիր են իրականացնում համայնքում, ոռոգման ցանցը ամբողջովին կնորոգեն»,- ասաց նա, հավելելով, որ նախկինում համայնքն ուներ ինքնաշատրվանող հորեր, որն օգտագործում էր խմելու նպատակներով, իսկ այժմ ցամաքել են, բնակիչները պոմպերով են խմելու ջուր ստանում:

Արարատի մարզից հատկապես վերջին շրջանում տարբեր գյուղերից բազմաթիվ խնդիրների շուրջ newspress.am կայք ահազանգերը շատացել են: Տպավորություն է ստեղծվում, որ վարչապետ Հովիկ Աբրահամյանը սկսել է «աչքաթող» անել սեփական մարզը: