Փողոցում վաճառվող ապրանքը գնելիս՝ 100-200 դրամ խնայում են, բայց գնում են, առնվազն, օրինակ, վտանգավոր միս․ ՍԱՏՄ ղեկավար

ՀՀ սննդամթերքի անվտանգության տեսչական մարմինը ստուգումներն է իրականացրել հանրային սննդի կետերում, իրացման ցանցերում, արտադրամասերում:

Տեսչական մարմնի ղեկավար Գեորգի Ավետիսյանը լրագրողների հետ հանդիպման ժամանակ հորդորեց զգոն լինել և պատահական վայրերից սնունդ չգնել։

Նա նաև տեղեկացրեց, որ տոնական օրերին ընդառաջ՝ դեկտեմբերի 21-ից սկսել են բացօթյա ապօրինի առևտրի դեմ պայքարի գործընթաց:

«Այս խնդիրը չի լուծվի, քանի դեռ ունենք փողոցից ապրանք գնող քաղաքացիներ: Փողոցից սնունդ գնելու դեպքում նրանք ոչ միայն իրենց չեն հարգում, այլև՝ իրենց ընտանիքի անդամներին: Փողոցում վաճառվող ապրանքը գնելիս՝ 100-200 դրամ խնայում են, բայց գնում են, օրինակ, առնվազն վտանգավոր միս»,- ասաց Գեորգի Ավետիսյանը:

Նրա խոսքով՝ խախտումներ իրականացրած տնտեսվարողները ենթարկվել են պատասխանատվության՝ տուգանքներ, գործունության ժամանակավոր կասեցում։

«Ամենահաճախ հանդիպող խախտումներից են՝ սանիտարական գրքույկների բացակայություն, հակամիջատային ցանցերի բացակայություն, աշխատակիցների ոչ պատշաճ վիճակ, սանիտարահիգիենիկ խնդիրներ և այլն: Շատ դեպքերում տնտեսվարողների շրջանում իրազեկման խնդիր կա: Դեպքեր կան, որ տնտեսվարողները փորձում են շրջանցել օրենքը, դեպքեր էլ կան, որ, չնայած տուգանվել են, միևնույնն է՝ խախտումը կրկնել են: Այսինքն՝ անլուրջ են վերաբերվել հարցին»,- ասաց Գեորգի Ավետիսյանը:

ՀՀ սննդամթերքի անվտանգության տեսչական մարմինը 941 տնտեսվարողի մոտ հայտնաբերել է խախտումներ: