Օզբիլիսը Ստամբուլում քննարկում է իր տրանսֆերի պայմանները. (տեսանյութ)

Ստամբուլում ծնված հայազգի ֆուտբոլիստ Արաս Օզբիլիսը, ով ներկայումս գտնվում է Թուրքիայում, 2015 թ-ի օգոստոս ամսին մերժել էր թուրքական «Բուրսասպոր» ֆուտբոլային ակումբի հրավերը և առհասարակ նա չէր ցանկացել տեղափոխվել թուրքական որևիցե ակումբ, սակայն այսօր Մոսկվայի «Սպարտակի» եւ Հայաստանի հավաքականի կիսապաշտպան Արաս Օզբիլիսը «Բեշիկթաշի» հետ բանակցություններ վարելու համար մեկնել է Ստամբուլ, Երեւանի ժամանակով 15:00-ին: Այս մասին տեղեկացնում է թուրքական ակումբի թվիթերյան էջը:

Newspress.am-ի տեղեկություններով այս պահին ֆուտբոլիստը բուժզննում է անցնում, որից հետո պետք է քննարկի իր տեղափոխման հարցը:

25-ամյա ֆուտբոլիստը եղել է  Աթաթուրքի անվան օդանավակայանում, որտեղ նրան դիմավորել են «Բեշիկթաշի» ներկայացուցիչները:

Թուրքական մամուլի համաձայն՝ Արաս Օզբիլիսը 4,5 տարվա պայմանագիր է կնքելու «Բեշիկթաշի» հետ, իսկ նրա տրանսֆերը կազմելու է 3 միլիոն եվրո:

Ավելի վաղ նշվում էր, որ «Բեշիկթաշը» մտադիր է մինչև այս մրցաշրջանի ավարտը Օզբիլիսին վարձավճարով տրամադրել Մադրիդի «Ռայո Վալյեկանոյին», որը վաղուց է հետաքրքրված նրանով: Թուրքական ակումբը հայ կիսապաշտպանին դիտարկում է որպես Գյոկհան Թորեին փոխարինող: Այս մրցաշրջանի վերջում թուրք կիսապաշտպանը տեղափոխվելու է ավելի ուժեղ առաջնություն:

Հիշեցնենք, որ Օզբիլիսի ծառայություններով հետաքրքրված են նաեւ Կրասնոդարի «Կուբանը» եւ լեհական «Լեգիան», որը գլխավորում է ռուսաստանցի մասնագետ Ստանիսլավ Չերչեսովը: «Սպարտակի» գլխավոր մարզիչ Դմիտրի Ալենիչեւն ավելի վաղ հաստատել էր, որ ձմեռային տրանսֆերային պատուհանի ժամանակ Արաս Օզբիլիսը հեռանալու է ռուսական ակումբից: Նա «Սպարտակի» հետ չի մեկնել Աբու Դաբի եւ Մոսկվայում մարզվում էր ակումբի երիտասարդական թիմի հետ: Օզբիլիսը 2013թ-ին «Կուբանից» է տեղափոխվել «Սպարտակ», որի կազմում անցկացրել է 35 խաղ՝ խփելով 3 գոլ: