Հիմա էլ աչք են տնկել Ազգային պատկերասրահի վրա

Երեկ Հայաստանի Ազգային պատկերասրահում տեղի է ունեցել տնօրեն Արման Ծատուրյանի հրավիրած մամուլի ասուլիսը: Նա ամփոփել է պատկերասրահի 2015 թվականի ձեռքբերումները և ընթացքը: Մասնավորապես, Արման Ծատուրյանն անդրադարձել է ազգային պատկերասրահի շենքին, ասելով, որ շենքի հարցը վաղուց է ծանրացել և բոլորին անհանգստացնում է, իսկ ղեկավար մարմիններում քննարկվում է այս հարցը:

Նա նաև հույս է հայտնել, որ գոնե այս տարի կսկսեն լրջորեն զբաղվել շենքի խնդրով, քանի որ ազգային պատկերասրահի շենքը չի համապատասխանում ժամանակակից թանգարանային նորմատիվներին: Ա. Ծատուրյանը վստահեցրել է, որ այդ ուղղությամբ արդեն լուրջ աշխատանքներ են կատարվում, և հավանական է, որ այս տարի պաշտոնապես կհայտարարվի Հայաստանի Ազգային պատկերասրահին նոր շենքի տրամադրման մասին:

Նշենք, որ 2000-ականներից հետո, երբ ընդունվեց օտարման վերաբերյալ օրենքը, Երևանի կենտրոնի պատմական շինությունները հայտնվեցին թիրախում: Այս տարիներին Երևանի գլխավոր ճարտարապետն էր ներկայիս քաղաքաշինության նախարար Նարեկ Սարգսյանը, ով այժմ ամեն կերպ չքմեղանում է, թե ինքը կապ չունի դրա հետ և կենտրոնի պատմամշակութային շենքերի օտարման հարցում ինքը մեղք չունի: Թեև նրան ոչ ոք չի հավատում, ինքն էլ չի հավատում երևի, սակայն գուցե ճարտարապետ լինելով հանդերձ հոգու խորքում հասկանում է, որ իր ձեռամբ վանդալիզմի թողտվություն է տրվել:

Կարելի է ասել, որ Հանրապետության Հրապարկի վրա մի կողմից «Մարիոթ» հյուրանոցն է, մյուս կողմից ԱԳՆ-ն է վերածվելու հյուրանոցի, ինչու չէ, նաև պատկերասրահը կարելի է օգտագործել հյուրանոցային նպատակներով, կմնա կառավարության շենքը և «Հյուրանոցային հրապարակը» կամբողջանա:

Հիշեցնենք, որ մի անգամ, պետական գույքի կառավարման վարչության պետ Արման Սահակյանն ասել է, որ ով ցանկանա, կարող է Երևանում տարածք գնել, չբացառելով անգամ կառավարության շենքը: Այնպես որ, Երևանի կենտրոնի մշակութային վանդալիզմը որոշվել է ամփոփել պատկերասրահով: Մշակույթի նախարարությունը պատահական չէ, որ հենց Արման Ծատուրյանին է գործուղել պատկերասրահ: Նա կարևոր առաքելություն ունի: Պատկերասրահին նոր շենք է պետք, պատկերասրահի շենքին` նոր օլիգարխ: