Պատմուճանով չեմ ծնվել, պատմուճանով չեմ էլ հեռանալու. դատավոր Աննա Փիլոսյան

Երևան քաղաքի ընդհանուր իրավասության դատարանում պաշտոնավարող դատավորը ծանրաբեռնված է թույլատրելիից եռակի անգամ ավելի։ Այս մասին ԲԴԽ-ում նիստի ընթացքում հայտարարել է Երևանի ընդհանուր իրավասության դատարանի դատավոր Աննա Փիլոսյանը։

«2020 թվականին կողմից դատական քննության առարկա դարձված 1530 քաղաքացիական գործից ավարտվել են 1019-ը, 2021 թվականին 2663 քաղաքացիական գործից 1638-ը, քննվել և լուծվել են 1027 արբիտրաժային գործերը, 2020 թվականին 2182 գործ է ստացվել, ևս 1012-ը նախորդ տարուց փոխանցված, ընդհանուր առմամբ 3396՝ միայն քաղաքացիական գործից»,- իր խոսքում նշել է դատավորը։

Փիլոսյանի խոսքով՝ բոլորի կողմից ընդունված անոմալ իրավիճակը պտտվում է մեկ մարդու՝ դատավորի շուրջ, որը գերմարդ չէ, ռոբոտ մեքենա չէ, ամենասովորական մարդն է՝ իրողություններին բնորոշ ամենասովորական մարդու ռեակցիաների վտանգներով. «Ես գիտակցում եմ, որ պատմուճանով չեմ ծնվել, պատմուճանով չեմ էլ հեռանալու։ Ինչ-որ մի ժամանակ ինձ պատիվ է ընձեռնված կրելու այդ պատմուճանը և մոտ կամ հեռավոր ապագայում առնվազն արտաքին դրսևորմամբ հնարավոր է, որ ես այդ պատմուճանը չկրեմ։ Փորձագետի կարծիքը ձեզ և նախարարությանը հասանելի դարձնելը մեկ նպատակ է հետապնդում՝ դուք եք այն մարմինները, որոնք մեր երկրում մշակում և իրագործում են դատավորներին կարգապահական պատասխանատվության ենթարկելու մեխանիզմները»։

ՀՀ արդարադատության նախարարությունը միջնորդություն է ներկայացրել ԲԴԽ՝ Երևանի ընդհանուր իրավասության դատարանի դատավոր Աննա Փիլոսյանին կարգապահական պատասխանատվության ենթարկելու մասին: Դատավորի նկատմամբ վարույթը հարուցվել էր փաստաբան Գայանե Պապոյանի ֆեյսբուքյան գրառման առնչությամբ, ըստ որի՝ դատավոր Աննա Փիլոսյանը պարզեցված կարգով քննված գումարի բռնագանձման պահանջի վերաբերյալ գործով կայացված վճիռը տրամադրում է վճռի հրապարակումից 2 տարի անց, այն էլ միայն դիմումի հիման վրա։

Դատավորի ելույթից հետո գործի քննությունն ավարտվել է։ ԲԴԽ-ն հեռացել է խորհրդակցական սենյակ՝ որոշում կայացնելու։