ԱԺ-ն վավերացրեց Հայաստանի և ԵՄ-ի միջև համաձայնագիրը

«ՀՀ և Եվրոպական միության միջև «Ստեղծագործ Եվրոպա» ծրագրին (2021-2027) Հայաստանի Հանրապետության մասնակցության մասին» համաձայնագիրը ստորագրվել է 2022 թ. սեպտեմբերին ՀՀ ԿԳՄՍ նախարարի և հոկտեմբերին ԵՄ նորարարության, հետազոտության, մշակույթի, կրթության և երիտասարդության հարցերով եվրահանձնաժողովի հանձնակատար Մարիա Գաբրիելի կողմից: ԵՄ մշակույթի ոլորտում թերևս ամենամեծն է «Ստեղծագործ Եվրոպա» ծրագիրը, որը հասանելի է ԵՄ հարևանության երկրների համար:

Այս մասին դեկտեմբերի 20-ի ՀՀ ԱԺ արտահերթ նստաշրջանի նիստում ասել է ՀՀ կրթության, գիտության, մշակույթի և սպորտի նախարարի տեղակալ Արթուր Մարտիրոսյանը` ներկայացնելով ««ՀՀ և Եվրոպական միության միջև «Ստեղծագործ Եվրոպա» ծրագրին (2021-2027 թթ.) ՀՀ մասնակցության մասին» համաձայնագիրը վավերացնելու մասին» օրենքի նախագիծը:

Հայաստանը միանում է «Մշակույթ» ենթածրագրին, որի նպատակն է պաշտպանել, զարգացնել և տարածել եվրոպական մշակութային և լեզվական բազմազանությունը՝ հանրահռչակելով Եվրոպայի մշակութային ժառանգությունը, ինչպես նաև ուժեղացնելով մշակութային ստեղծարար ոլորտների մրցունակությունը և ապահովելով կայուն ու ներառական աճ: Ծրագիրը հնարավորություն է ընձեռում Հայաստանի մշակութային և ստեղծագործ ոլորտի կազմակերպություններին ծավալելու միջսահմանային համագործակցություն նույն ոլորտի եվրոպացի գործընկերների հետ, ինչպես նաև խթանում է շփումները մշակույթի գործիչների միջև:

Կտրամադրվեն դրամաշնորհային ծրագրեր գրականության, թատրոնի, ճարտարապետության, կերպարվեստի, երաժշտարվեստի, դիզայնի և մի շարք այլ ոլորտներում:

Սա ծրագրի երկրորդ շրջափուլն է: Ծրագրի շրջանակում կձևավորվի համապատասխան գրասենյակ, որը կզբաղվի մշակութային գործիչների իրազեկության բարձրացմամբ, նրանց կարողությունների զարգացմամբ:

Ըստ Արթուր Մարտիրոսյանի` ծրագիրը նախատեսում է շուրջ 400 հազար եվրոյի մասնակցության վճար, որով Հայաստանը կկարողանա շատ ավելի մեծ գումարներ գեներացնել մշակույթի համար:

Պատգամավոր Գեղամ Նազարյանը հետաքրքրվել է՝ արդյո՞ք Հայաստանին պարտադրվելու են հայ իրականության հետ կապ չունեցող մշակույթի ինչ-ինչ տարրեր, ասենք՝ անհասկանալի մշակույթների ներդրում ու տարածում: Արթուր Մարտիրոսյանը նշել է, որ խոսքը վերաբերում է մշակույթի ոլորտի՝ լայն առումով զարգացմանը: «Սա մեզ համար մեծ հնարավորություն է եվրոպական մեծ տիրույթում ծավալել մշակութային համագործակցություն, հայկական մշակույթը հանրահռչակել»,-մանրամասնել է հիմնական զեկուցողը:

Գլխադասային հանձնաժողովի դրական եզրակացությունը ներկայացրել է Եվրոպական ինտեգրման հարցերի մշտական հանձնաժողովի նախագահ Արման Եղոյանը՝ կարևորելով ծրագրին մասնակից լինելը:

Քվեարկությամբ խորհրդարանն ընդունել է քննարկված նախագիծը: