Եթե էդ ասողը կարա գա ու եկամուտով քշի, թող գա քշի. գյուղապետն ամեն ինչի մեջ եկամուտ է փնտրում

Երևանից շուրջ 85 կմ հեռավորության վրա գտնվող Լուսաշող գյուղից մարդիկ Երևան չեն գալիս: Պատճառն այն է, որ Լուսաշողից Երևան երթուղի չի աշխատում: Ոչ էլ բարեկարգ ճանապարհ կա:

newspress.am-ի հետ զրույցում, բնակիչները նկատեցին, որ արդեն տևական ժամանակ է` խնդիրը կա:

«Կամ հասնում ենք հարևան գյուղ` էնտեղից ենք գնում, կամ էլ տաքսի ենք վարձում: Բայց ինչքա՞ն կարող ենք տաքսու փող տալ, թե գործով քաղաք ենք գնում» ,- ասաց գյուղացիներից մեկը՝ հավելելով, որ հատկապես բերքահավաքի սեզոնին իրենց ապրանքն իրացնելու խնդիր ունեն:

Գյուղացիների խոսքով, երբ այս մասին բարձրաձայնել են ու դիմել գյուղապետ Հարություն Հարությունյանին, նա ասել է, թե իրենք տրանսպորտի կարիք չունեն:

Newspress.am-ի հետ զրույցում գյուղապետն ասաց. «Եթե էդ ասողը կարա գա ու եկամուտով քշի, թող մեքենան բերի դնի գծի մեջ ու քշի: Վարորդները շահույթ չեն ստանում, դրա համար էլ չեն քշում»,- ջղաձիգ տոնով ասաց գյուղապետը:

Նրա խոսքով, մինչև վերջին տարիները, գծի շահագործման համար հայտարարված մրցույթում շահած ընկերությունը որոշ ժամանակ փորձել է աշխատեցնել այն, սակայն քանի որ շահույթ չէր ստանում՝ հանել է իր տրանսպորտը: Գյուղապետն ասում է, թե խնդրին ոչ միայն մարզպետարանում, այլև տրանսպորտի և կապի նախարարությունում են տեղյակ, սակայն լուծում չեն տեսնում: Շահույթ չունեն՝ չեն քշում:

«Եթե շահավետ լիներ` մեկը չէ, մի քանիսը էդ բիզնեսի մեջ մտած կլինեին», -ասացգյուղապետը:

Սա այն դեպքում, երբ առողջական խնդիրներով անգամ գյուղի բակիչներն ստիպված են դուրս գալ համայնքից ու գնալ կամ հարևան գյուղեր, կամ էլ՝ մայրաքաղաք, քանի որ գյուղում նույնիսկ բուժամբուլատորիա չկա: Շտապ օգնության կանչերին էլ արձագանքում է Վեդին:

Գյուղապետն ասում է, թե դեռ չի եղել այնպես, որ նրանք չգան կանչին, սակայն հարկ է նկատել, որ Վեդիից մինչև Լուսաշող մոտ 30 կմ հեռավորություն է: Մի կողմից այս հեռավորության, մյուս կողմից էլ ճանապարհի անբարեկարգ վիճակի պատճառով շտապ օգնության մեքենան մեկ ժամից շուտ չի հասնում: Սա նշանակում է, որ հիվանդին առաջին բուժօգնությունը հասցվում է մեկ ժամից ոչ շուտ:

Հարություն Հարությունյանը նկատում է, որ կադրեր չունեն:

Ստացվում է` բուժքույր պահելու համար էլ շահույթ է հարկավոր. կադրերը գյուղում չեն մնում, քանի որ քիչ աշխատավարձ են խոստանում: