Ֆրանսիան այն պետությունն է, որ «Գորշ գայլերին» ահաբեկիչ ճանաչեց. նրանք այժմ փակել են Լաչինը. Արման Թաթոյան

Ադրբեջանն այսօր իրականացնում է Արցախի շրջափակում եւ Արցախի հայության բնաջնջման քաղաքականություն: Այս մասին ՀՀ-ում Ֆրանսիայի դեսպանատան դիմաց բողոքի ակցիայի ժամանակ հայտարարեց Հայաստանի նախկին ՄԻՊ Արման Թաթոյանը:

«Նրանք այսօր փոխել են իրենք մարտավարությունը, ինչ-որ բնապահպանական ակտիվիստներ են բերել, փորձում են ցույց տալ, թե իբր մարդու իրավունքների իրացմամբ են զբաղված: Բայց Ֆրանսիան այն պետություններից է, որ իրապես գիտակցում է մարդու իրավունքների արժեքը և նաև պետք է հստակ արձանագրվի, որ ադրբեջանական այս ակցիան որևէ կապ չունի բնապահպանական ակտիվիստների հետ: Նրանք պետության կողմից ուղարկված, պետական կազմակերպմամբ գործող մարդիկ են՝ նախկին ու ներկա զինվորականներ: Մարդիկ, որոնք ֆինանսավորվում են ուղիղ Ադրբեջանի բյուջեից: Նրանց թվում են «Գորշ գայլերի» անդամներ: Ես շատ լավ հիշում եմ, որ 44-օրյա պատերազմի ժամանակ Ֆրանսիայի դեսպանն ինձ հետ հանդիպմանն ասաց, որ Ֆրանսիան արգելել է «Գորշ գայլերի» գործունեությունը Ֆրանսիայում որպես տեռորիստական կազմակերպություն: Դրանք այն մարդիկ են, որոնք պատերազմից անմիջապես հետո հենց Ֆրանսիայի տարածքում որսի էին ելել, փորձում էին գտնել հայերի, որ հաշվեհարդար տեսնեն»,-ասաց Թաթոյանը:

Նա հայտարարեց, որ Ադրբեջանի սանձարձակ պահվածքը անպատժելիությամբ ոգևորված լինելն է, և հենց դա պետք է կանխարգելվի: