Դուք թո՞ւյլ եք տալու, համաձայնվելո՞ւ եք, որ սա թույլ տա, որ Արցախը մտնի Ադրբեջանի կազմ. Շարմազանով

Այսօրվա հրատապ հավաքի նպատակները մի քանիսն են, բայց ամենակարևորն այն է, որ մենք Եռաբլուրը չենք ուրացել, որ մենք Վազգենի, Մոնթեի, Օսկոլկա Աշոտի, Դուշման Վարդանի ժառտանգներն ենք, որ մենք անկախ ու ինքնիշխան Հայաստանի, հայկական ու անկախ Արցախի, Աշոտ Նավասարդյանի, Անդրանիկ Մարգարյանի դավանած արժեքների կրողներն ու ժառանգներն ենք: Այս մասինՀանրապետության հրապարակում ընթացող հավաքի ժամանակ ասաց ՀՀԿ ԳՄ անդամ Էդուարդ Շարմազանովը։

«Որքան էլ սրանք կանգնեն ասեն, որ թուրք լինելուց չեն վիրավորվում, Ալիևից ավելի լավ հիմնավորեն, որ Արցախն Ադրբեջանինն է, Լաչինի միջանցքի հարցը գցեն ռուսների գրպանը, մենք ասում ենք՝ աշխարհ, Հայաստանում կան մարդիկ, քաղաքական ուժեր, սովորական քաղաքացիներ, որոնք թքած ունեն սրանց վրա ու անգլոսաքսոնական, ՆԱՏՕ-ական ու թուրքական պիղծ արժեքների ջատագովը չեն»,- հայտարարեց Էդուարդ Շարմազանովը։

Նա նշեց, որ 2018 թվականին Փաշինյանին աշխարհաքաղաքական ուժերը բերեցին իշխանության, որ հայ ժողովուրդը հրաժարվի իր պատմական ու ազգային արժեքներից, «կաղապարներից», ինչպես ձևակերպել էր ամերիկացի դիվանագետ Ջոն Բոլթոնը. «Իսկ այդ պատմական ու ազգային «կաղապարներից» ամենառաջին տեղում հայկական ու անկախ Արցախն է։ Դուք թո՞ւյլ եք տալու, համաձայնվելո՞ւ եք, որ սա թույլ տա, որ Արցախը մտնի Ադրբեջանի կազմ։

Ժողովուրդ, որպեսզի աշխարհը մեզ հետ հաշվի նստի, որպեսզի մեր դաշնակիցը լսի մեր խոսքը , մենք պետք է ցույց տանք, որ ազգ ենք, թասիբ ունենք, Եռաբլուրի արյամբ ձեռքներս չենք լվացել։ Սա Պիղատոսի նման, ձեռքները Արցախից լվացել է։ Գործը հասել է նրան, որ դեկտեմբերի 10-ին՝ Արցախի անկախության հանրաքվեի օրը, գոնե մի ուղերձ չի հղում: Ոնց կարա հղի, Ալիևն ու Էրդողանը կպատժեն։

Պառլամենտում իրար հերթ չտալով կանգնում ասում են՝ գնանք Լաչին ի՞նչ անենք, թող ՌԴ դեսպանը գնա։ Այ հոգնածներ, բա տղա՞ եք, գնացե՛ք Գորիս-Կապան, գնացե՛ք Սև լիճ, Ջերմուկի սարերն ու Ստեփանակերտ։ Երկու տարի շարունակ, կապիտուլյացիայից հետո, սա ռիսկ չի անում գնա Ստեփանակերտ։

Այսօր կանգնենք տոնածառ, տոնածառ խաղանք, երբ 120 000 հայություն ցրտի ու մթի մեջ է, դա դավաճանություն չէ, ստրկամտություն չէ, աշխարհի ամենավատ բանն է։ Այսօր մենք կանգնած ենք շատ լուրջ խնդրի առջև՝ մի կողմից ձեռքերն են լվանում Արցախից, մյուս կողմից էլ ուրանում են Հայոց ցեղասպանությունը»,- ասաց նա։