Վիճակն օրհասական է, խոսքերի ժամանակն անցել է, պետք է անցնել շատ ռեալ գործողությունների․ զոհվածի մայրը խնդրանքով դիմում է հայ հանրությանը

Վիճակն օրհասական է, խոսքերի ժամանակն անցել է, հիմա գործելու ժամանակն է, ամեն բան բազմաթիվ անգամներ ասվել է։ Այս մասին այսօր կառավարության դիմաց հաջակցություն Արցախի հրատապ հավաքի ժամանակ ասաց 44-օրյա պատերազմում զոհված Հայկ Մելիքյանի մայրը՝ Նաիրա Մելիքյանը։ 

«Այս խունտայի և խունտան առաջնորդող թուրքի քայլերը բերեցին այս վիճակին։ Ամեն օր մենք տեսնում ենք ավելի ահագնացող վտանգներ, տեսնում ենք, որ տարածքային կորուստներ ունենք արդեն Հայաստանում, Արցախը շրջափակման մեջ է, սրանք նորից քարոզում են բարեկամության օրակարգ և միաժամանակ խոսում են ցեղասպանության մասին։ Դա նշանակում է, որ, այո՛, մեզ ցեղասպանելու են, իսկ մենք մորթվող գառան նման պետք է գնանք մորթվելու»։ 

Ըստ զոհվածի մոր՝ պետք է անցնել շատ ռեալ գործողությունների, ոչ թե քայլերթեր, հավաքներ, հայտարարություններ անել, այլ կոնկրետ ծրագիր։

«Մենք գիտենք՝ մեր դեմ ինչ մեքենա է աշխատում, ինչ տեխնոլոգիաներ են կիրառում, գիտենք՝ ինչ դրամական ռեսուրսներ են ուղղել դրան։ Եթե անգամ մենք չունենք այդ հնարավորությունները, կարելի է նույն տեխնոլոգիաներով փորձենք սրանց հեռացել, բայց այն, որ պետք է անցնել ռացիոնալ գործողությունների, որովհետև այլևս սպասել չի կարելի, միանշանակ է»։

Զոհվածի մայրը նշեց, որ ինքն այժմ վախ ունի, որ իր որդու գերեզմանն ինքը չի կարողանա պաշտպանել, անգամ դրա իրավունքը չի ունենա, իսկ ինքն այսօր այդ գերեզմանով է ապրում։

Տիկին Նաիրան դիմեց հայ հանրությանը, խնդրեց, որ զարթնեն, անտարբերությունն ու ցավը մի կողմ դնեն։

«Ամանորյա էս խրախճանքը, տոնածառի լույս են վառում, սա խայտառակություն է։ 1915 թվին մեզ այսպես են մորթել, երիտթուրքերն էլ էին գոռում խաղաղության մասին, դրան հետևեց Հայոց ցեղասպանությունը։ Հիմա սցենարը նույնությամբ կրկնվում է, մենք ազգովի դրսևորում ենք նույն վարքագիծը, և սա մեզ չի ներվելու։ Սա մեր վերջին պետականության վերջն է լինելու և հետևաբար պետք է դուրս գանք փողոց և պաշտպանենք մեր իրավունքը, մեր պետությունը»։