Այս իշխանությունն է, որ եկել է և սեփական նեղ, բիզնես շահերից ելնելով՝ գրավադրել է Արցախը, Արցախն է մեր պաշտպանիչ վահանը․ Չալաբյան

Ես կարծում եմ, որ մենք դժբախտաբար ունենք ծայրահեղ ցինիկ իշխանություն, որը անհասկանալի կերպով մեր ժողովրդի վզին փաթաթում է մի դոկտրին, որ Արցախը կարող է լինել Ադրբեջանի կազմում։ Այս մասին այսօր ՄԱԿ-ի գրասենյակի առաջ լրագրողների հետ զրույցում ասաց հասարա-քաղաքական գործիչ Ավետիք Չալաբյանը։ 

«Բոլորիս համար ակնհայտ է, որ դա աբսուրդ է՝ Արցախը չի կարող լինել Ադրբեջանի կազմում որևէ ձևով։ Ադրբեջանի կազմում կմնան լեռները, քարերը, բայց ոչ մարդիկ, ոչ էլ ամբողջ ժառանգությունը, որ մենք ստեղծել ենք Արցախում հազարամյակների ընթացքում։ Ադրբեջանն այս ընթացքում իր տարածքում եղած ամբողջ հայկական ժառանգությունը՝ Արցախի մնացած հատվածից դուրս, մեթոդաբար ոչնչացրել է։ Խոսքը Շահումյանի շրջանի, Հադրութի, Շուշիի, Արցախի հյուսիսի, Գանձակի, Նախիջևանի մասին է և այլն»,- ասաց Չալաբյանը։ 

Նրա խոսքով՝ Ադրբեջանը հետևողականորեն գնալու է ամբողջ հայկական ժառագությունը ոչնչացնելու և հայ բնակչությանն այտեղից տեղահանելու ճանապարհով։

«Այս պայմաններում իշխանությունը որդեգրել է հետևյալ դիրքորոշումը, որ մենք ոչ մի բան չենք կարող անել։ Դա սուտ է։ Մենք կարող ենք անել և մինչև այս իշխանությունը մենք արել ենք։ Այս իշխանությունն է, որ եկել է և սեփական նեղ, բիզնես շահերից ելնելով՝ գրավադրել է Արցախը։ Չկա Հայաստանը գրավադրելու խնդիր, ընդհակառակը՝ քանի կա Արցախը, Արցախն է մեր պաշտպանիչ վահանը, Արցախի վրա է կենտրոնացված Ադրբեջանի ներուժը և Հայաստանը պաշտպանված է։ Հիմա տեսնում եք՝ ինչ վիճակ է՝ և՛ Արցախն է հարվածի տակ, և Հայաստանը»,- ասաց ընդդիմադիր գործիչը՝ հավելելով, որ խոսք չի գտնում դատապարտելու այս իշխանությանը։

«Ե՛վ ցինիկ, և՛ կարճատես, և՛ ազգադավ դիրքորոշում, որ մեզ բերել, հասցրել է այս փակուղուն, երբ մեր աչքի առաջ Արցախը կարող է հայաթափվել, դրա հաջորդ քայլը կլինի Սյունիքի հայաթափումը և ընդհանրապես Հայաստանի վերացումը՝ որպես անկախ պետություն»։